Akola Veterinary College : महाविद्यालय पशुधनाला संजीवनी देणारे ठरेल

Akola News : आपल्या कृषिप्रधान अर्थव्यवस्थेत पशुपालन क्षेत्राचे मोलाचे योगदान आहे. सक्षम मनुष्यबळ निर्मितीसाठी महाराष्ट्र पशू व मत्स्य विज्ञान विद्यापीठ सदैव क्रियाशील आहे. विद्यापीठाच्या रौप्य महोत्सवी वर्षात अकोला येथे पशुवैद्यकीय व पशुविज्ञान महाविद्यालय म्हणजे विदर्भासह महाराष्ट्रासाठी नवसंजीवनी देणारे ठरेल, असे मत विद्यापीठाचे कुलगुरू डॉ. नितीन पाटील यांनी व्यक्त केले.

पशुवैद्यकीय शाखेच्या अभ्यासक्रमासाठी प्रवेशित प्रथम वर्ष विद्यार्थ्यांच्या महाविद्यालय परिचय कार्यक्रमाच्या उद्घाटन प्रसंगी ते प्रमुख पाहुणे म्हणून बोलत होते. पूर्वाश्रमीच्या स्नातकोत्तर पशुवैद्यक व पशु विज्ञान संस्थेची ओळख आता पशुवैद्यकीय व पशुविज्ञान महाविद्यालय अशी झाली असून शिक्षण, संशोधन आणि विस्तारकार्य अशा तीनही क्षेत्रात लोकाभिमुख कामगिरीसाठी सज्ज झाले असल्याचे मत त्यांनी व्यक्त केले.

याप्रसंगी विद्यापीठाचे अधिष्ठाता व शिक्षण संचालक डॉ. शिरीष उपाध्ये आणि भारतीय पशुवैद्यक परिषदेचे उपाध्यक्ष डॉ. संदीप इंगळे उपस्थित होते. कार्यक्रमाचे प्रास्ताविक महाविद्यालयाचे सहयोगी अधिष्ठाता डॉ. चैतन्य पावशे यांनी केले. हे नवीन महाविद्यालय उभारणीसाठी खासदार अनुप धोत्रे तसेच आमदार रणधीर सावरकर यांचे मोलाचे सहकार्य लाभल्याचे नमूद केले. डॉ. पाटोदकर यांनी विद्यार्थ्यांना विविध शैक्षणिक नियमावली बद्दल मार्गदर्शन केले.

पशुसंवर्धन उपायुक्त डॉ. जगदीश बुकतारे, जिल्हा पशुसंवर्धन अधिकारी डॉ. नरेंद्र अरबट , पदवी महाविद्यालयाचे प्रकल्प अधिकारी डॉ. मिलिंद थोरात, अनेक माजी प्राध्यापक, विद्यार्थी, अधिकारी व कर्मचारी आणि इतर मान्यवर उपस्थित होते.

कार्यक्रमाचे सूत्रसंचालन डॉ. प्रवीण बनकर यांनी केले तर आभार डॉ. कुलदीप देशपांडे यांनी मानले. कार्यक्रमासाठी डॉ. सुनील वाघमारे, डॉ. श्याम देशमुख, डॉ. शैलेंद्र कुरळकर डॉ. रणजीत इंगोले ,डॉ. सतीश मनवर, रामेश्वर लोथे, सुधीर देशमुख आणि विद्यार्थ्यांनी पुढाकार घेतला.