Veterinary Digitalization: शिरवळच्या पशुवैद्यकीय महाविद्यालयाकडून डिजिटायझेशन

Nagpur News: डिजिटल युगाची चाहूल ओळखत महाराष्ट्र पशू व मत्स्य विज्ञान विद्यापीठअंतर्गत असलेल्या क्रांतिसिंह नाना पाटील पशुवैद्यकीय महाविद्यालय शिरवळ (सातारा) द्वारा त्यांच्या संकेतस्थळावर तब्बल ७५ ई-लिफलेट उपलब्ध करून देण्यात आले आहेत. कागदाचा अपव्यय देखील या माध्यमातून टाळता येणार असून, पर्यावरण रक्षणाचा उद्देशही साधला जाणार आहे.

आता मोबाइलच्या माध्यमातून सर्वच प्रकारचे तंत्रज्ञान एका टचवर उपलब्ध झाले आहे. आवश्‍यक ती माहिती एका टचवर उपलब्ध करुन घेतली जाते. महाराष्ट्र पशू व मत्स्य विज्ञान विद्यापीठ (माफसू) अंतर्गत असलेल्या क्रांतिसिंह नाना पाटील पशुवैद्यकीय महाविद्यालयाने देखील काळाची पावले ओळखत मोबाइलवर माहिती प्रसारासाठी पुढाकार घेत विस्ताराकामी तंत्रज्ञानाचा प्रभावी वापरावर भर दिला आहे.

शिरवळ पशुवैद्यकीय महाविद्यालयाच्या विस्तार विभाग प्रमुख डॉ. स्मिता कोल्हे यांनी दिलेल्या माहितीनुसार, दोन वर्षाचा ई-रिर्सोस डेव्हल्पमेंट ऑफ डिजिटायझेशन ऑफ एक्‍सटेशन असा प्रकल्प राबविण्यात आला. त्याद्वारे महाविद्यालयाच्या संकेतस्थळावर पशुविज्ञान तसेच कुक्‍कुटपालनाविषयक विविध प्रकारची माहिती डिजिटल स्वरूपात उपलब्ध करून देण्यात आली आहे.

गरजेच्यावेळी ही माहिती तत्काळ डाउनलोड करून ते वाचता येणार आहे. knpcvs.in असे महाविद्यालयाचे संकेतस्थळ आहे. याच संकेतस्थळावर कुक्‍कुटपालन मार्गदर्शिका तसेच दुधाळ जनावरांचे व्यवस्थापन मार्गदर्शिका असे दोन ॲपच्या लिंक देखील आहेत. ॲपचा वापर देखील दुग्ध आणि कुक्‍कुटपालन व्यावसायिकांना रोजच्या व्यवहारात करता येईल.

‘माफसू’चे कुलगुरू डॉ. नितीन पाटील, विस्तार संचालक डॉ. अनिल भिकाने, शिरवळ महाविद्यालयाचे सहयोगी अधिष्ठाता डॉ. व्ही.एस. वासकर यांच्या मार्गदर्शनात डिजिटायझेशन प्रकल्प प्रभावीपणे राबविला जात असल्याचेही डॉ. कोल्हे यांनी सांगितले.