Lumpy Vaccination : वाशीम जिल्ह्यात लसीकरणाला वेग

वाशीम : जिल्ह्यात लम्पी स्कीन (Lumpy Skin) रोगाने पाय पसरले असून त्यावर उपाययोजना म्हणून लसीकरणाला (Vaccination) वेग देण्यात आला आहे. आतापर्यंत सुमारे ३५२ जनावरांना प्रादुर्भाव झाला असून, १३ जनावरांचा मृत्यू झालेला आहे. लसीकरणानंतर १६० जनावरे बरी झाली असून, सध्याही १७९ बाधित जनावरांवर उपचार सुरू आहेत.

वाशीम जिल्ह्याइतके लाख ६८ हजार पशुधन असून, आतापर्यंत एक लाख ६५ हजार जनावरांचे लसीकरण झाले आहे. जिल्ह्यातील सहाही तालुक्यांत आतापर्यंत ४५ गावांतील ३५२ गुरांना ‘लम्पी स्कीन’चा प्रादुर्भाव झाला होता. जिल्ह्यातील लम्पी स्कीनचा प्रादुर्भाव झालेली जनावरे आढळून आलेल्या

या गावांच्या पाच किलोमीटर परिघातील २०३ गावातील गुरांचे लम्पी स्कीन प्रतिबंधक लसीकरण तातडीने करण्यात आले. जिल्ह्यात लम्पी स्कीनचा संसर्ग अन्य जनावरांना होऊ नये यासाठी जिल्हाधिकारी षन्मुगराजन एस. यांनी तातडीचे निर्देश दिल्याने जिल्ह्यात मोठ्या प्रमाणात गुरांचे लसीकरण करण्यात आले.

त्यामुळे या आजाराचा जिल्ह्यात संसर्ग रोखण्यास मोठ्या प्रमाणात मदत झाली.

ज्या अल्पभूधारक व अत्यल्पभूधारक शेतकऱ्यांच्या गुरांचा लम्पी स्कीनमुळे मृत्यू झाला आहे, त्यांना राष्ट्रीय आपत्ती निवारण कायद्यानुसार मदत दिली जाणार आहे. लम्पी स्कीनमुळे मृत्यू पावलेल्या गायीच्या पालनकर्त्याला ३० हजार रुपये,

बैलासाठी २५ हजार रुपये आणि गोऱ्याचा मृत्यू झाला असल्यास १६ हजार रुपये मदत दिली जाणार आहे. ज्या पशुपालकांची गुरे लम्पी स्कीनने बाधित आहे, त्या बाधित जनावरांवर उपचारासाठी येणाऱ्या पशुवैद्यकीय अधिकारी व कर्मचाऱ्यांना पशुपालकांनी सहकार्य करावे व आपली गुरे लसीकरण व

औषधोपचारातून लम्पी स्कीन आजारमुक्त करावी.