Livestock Census : यंदा पशुधनाची गणना मोबाइलद्वारे होणार

Sangli News : जिल्ह्यामध्ये सप्टेंबरपासून एकवीसावी पशुगणना राबविण्यात येणार आहे. त्यासाठी पशुसंवर्धन विभाग सज्ज झाला आहे. या वेळी सर्व प्रकारच्या पशुधनाची गणना प्रगणक व पर्यवेक्षक मोबाइलवरून करणार आहेत. यासाठी सध्या २०२ हून अधिक प्रगणकांचे प्रशिक्षण पूर्ण झाले. लवकरच पशुगणना सुरू होईल, अशी माहिती पशुसंवर्धन विभागाच्या सूत्रांनी दिली.

जिल्ह्यात विसाव्या पशुगणनेनुसार १४ लाख ३ हजार ६३३ जनावरांची संख्या आहे. दर पाच वर्षांनी पशुगणना करण्यात येते. यावर्षी एकविसावी पशुगणना केली जाणार आहे. त्यासाठी पशुसंवर्धन विभागाने तयारी देखील केली आहे. पशुसंवर्धन विभागामार्फत पशुधनाच्या गणनेसाठी २०२ प्रगणक व ३७ पर्यवेक्षक नेमले आहेत. यांचे प्रशिक्षण पूर्ण झाले आहे. यांना मोबाइलद्वारे पशुधनाची गणना कशी करायची, याबाबत माहिती पुस्तिकाही देण्यात आली आहे.

यावर्षीची एकविसावी पशुगणना सप्टेंबरमध्ये सुरू होणार आहे. त्यासाठी मोबाइल अॅप्लिकेशन आणि वेबपोर्टल तयार केले आहे. या डिजिटल पद्धतीचा वापर करूनच जिल्ह्यातील पशुधनाची गणना केली जाणार आहे. जिल्ह्यातील ग्रामीण आणि शहरी भागात गाय, म्हैस, मेंढी, शेळी अशी पशुगणना होणार आहे. डिसेंबरपर्यंत हे सर्वेक्षण चालणार आहे

वास्तविक पाहता एक सप्टेंबरपासून ही पशुगणना सुरू होणे अपेक्षित होते. परंतु वरिष्ठ पातळीवरण पशुगणना करण्याचे आदेश मिळाले नसल्याने ही पशुगणना सुरू होण्यास विलंब लागत असल्याचे चित्र आहे. या आठवड्यात पशुगणना करण्याचे आदेश मिळतील, अशी शक्यता पशुसंवर्धन विभागाच्या अधिकाऱ्यांनी व्यक्त केली.

विसाव्या पशुगणनेतील आकडेवारी

* गाय वर्ग ३,२४,७५६

* म्हैस वर्ग ४,९३,९९८

* मेंढी १,३०,७५४

* शेळी ४,५४,१२५

* एकूण १४,०३,६३३