Livestock Market : उन्हाळा सुरू होताच पशुधनाची वाढली विक्री

Latur News : तालुक्यातील किनगाव येथे जनावराच्या खरेदी विक्रीचा बाजार मोठ्या प्रमाणात होतो. लाखावर किमती असलेल्या जनावराच्या खरेदी विक्रीतून कोट्यवधीची उलाढाल होत आहे.

दरम्यान, उन्हाळा लागताच शेतकरी, पशूपालकांकडून पशुधनाची विक्री सुरू झाल्याचे चित्र आहे. तालुक्यातील किनगाव हे गाव लातूरसह बीड, परभणी, नांदेड जिल्ह्याच्या सीमा लगत आहे. या ठिकाणी दर बुधवारी भाजीपाल्याचा व जनावराचा बाजार भरतो. बाजारात जनावराच्या खरेदी विक्री हे मोठ्या प्रमाणात होत आहेत.

दरम्यान, बुधवारी (ता. १९ ) आठवडे बाजारात एक लाख २५ हजार रुपयांपर्यंतच्या म्हैस विक्रीसाठी आल्या होत्या. आठवडी बाजारात बैल, म्हैस, शेळी, बकरा अशा जनावराच्या खरेदी व विक्री मोठ्या प्रमाणात होत आहे.

महाराष्ट्रासह कर्नाटकातून जनावरे खरेदी-विक्रीसाठी व्यापारी व खरेदीदार येत आहेत. दुभत्या जनावरांच्या दूध देण्याच्या क्षमतेवरून किंमत ठरत असून ५० हजार ते एक लाख २५ हजारपर्यंत दुभती जनावरे विकली आहेत.

सजावट करून आणतात पशुधन

किनगावच्या आठवडे बाजारात अनेक पशुपालक, शेतकरी पशुधन सजावट करून आणतात. जनावरांना घुंगर पट्टा, पैंजणासह आकर्षक बनवून विक्रीसाठी आणले जाते. जनावराची खरेदी विक्री होत असताना त्याची शरीर यष्टी, दात रचना, चाल, नख्या या बाबी तपासून खरेदी-विक्री होते.