Lumpy Skin : खानदेशात ‘लम्पी’ प्रतिबंधक लसीकरण प्रक्रिया संथ

Jalgaon News : खानदेशात लंपी स्कीन आजाराची समस्या गोवर्गीय पशुधनात वाढली आहे. जळगाव जिल्ह्यात हा आजार पसरत आहे. दुसरीकडे लसीकरण प्रक्रिया मात्र संथगतीने सुरू आहे. लसीकरण सुरूच आहे. जळगाव जिल्ह्यात सुरुवातीला धरणगाव, एरंडोल या भागांत हा आजार पशुधनात होता. नंतर पारोळा, पाचोरा, अमळनेरमध्ये हा आजार पसरला.

आता जळगाव, जामनेर, चोपडा भागातही हा आजार पसरला आहे. मागील वर्षी रावेर, जळगाव, मुक्ताईनगर, जामनेर, बोदवड या भागांत या आजाराने पशुधनाची हानी झाली होती. यंदा एरंडोल, धरणगाव, पारोळा, अमळनेर, पाचोरा भागात पशुधनाची हानी अधिक होत आहे. मागील काही दिवसांत जळगाव जिल्ह्यात ११ पशुधन या आजारामुळे मृत्युमुखी पडले आहे.

धुळे व नंदुरबारमध्येही लसीकरण सुरू आहे. पण पशुधनाचा मृत्यूदर वाढू लागला आहे. धुळे व नंदुरबारमध्ये सातपुडा पर्वत व लगत हा आजार दिसला आहे. मागील आठवडाभरात सुमारे सात पशुधनाचा मृत्यू या दोन्ही जिल्ह्यांत झाला आहे. दुर्गम भागांत यंत्रणा पोचत नसल्याने हा आजार टिकून राहिला. त्याने आता डोके वर काढले असून, दूध उत्पादक चिंतेत आहेत.

जळगाव जिल्ह्यात पशुधन या आजाराने बेजार आहे. जिल्ह्यात लसीकरण गतीने सुरू आहे, असा दावा प्रशासन करते. पण दुसरीकडे अनेक पशुपालक खासगी पशुवैद्यकांच्या मदतीने उपचार, लसीकरण करून घेत आहेत.

यात अधिकचा खर्च येत आहे. अनेक भागांत शासकीय यंत्रणा पोचलेली नाही. पशुधन पर्यवेक्षक लसीकरणासाठी पैसे घेत असल्याच्या तक्रारीदेखील दूध उत्पादक करीत आहेत.