Lumpy Skin Disease: बुलडाण्यात ‘लम्पी’ प्रतिबंधक लसीकरण मोहीम वेगात

Buldana News: बुलडाणा जिल्ह्यात काही तालुक्यांमध्ये गोवर्गीय पशुधनामध्ये लम्पी हा त्वचा आजार पसरत आहे. प्रामुख्याने मलकापूर, देऊळगावराजा, सिंदखेडराजा, खामगाव आणि चिखली या तालुक्यांमध्ये हा आजार वेगाने वाढत आहे.

त्यामुळे या लम्पी आजाराच्या पार्श्‍वभूमीवर पशुपालकांनी तातडीने प्रतिबंधात्मक उपाययोजना राबवाव्यात, असे आवाहन जिल्हा उपआयुक्त पशुसंवर्धन व दुग्ध व्यवसाय डॉ. अमितकुमार दुबे यांनी केले.

या आजाराचा फैलाव रोखण्यासाठी लसीकरण मोहीम तसेच जनजागृती अभियान जिल्ह्यातील विविध गावांमध्ये सुरू आहे. जिल्ह्यातील मलकापूर, देऊळगाव राजा, सिंदखेड राजा, खामगाव आणि चिखली तालुक्यांमध्ये गोवंशीय पशुधनामध्ये लम्पीसदृश लक्षणे आढळली असून, पुणे येथील रोग अन्वेषण प्रयोगशाळेकडून नमुन्यांचे निष्कर्ष होकारार्थी आले आहेत.

त्यामुळे आजाराचा प्रसार इतर भागांमध्ये होऊ नये यासाठी प्रतिबंधात्मक उपाययोजना तातडीने राबविण्यात येत आहेत. जिल्ह्यात एकूण तीन ६०८१५ गोवर्गीय पशुधन असून यापैकी तीन लाख १६५०० पशुधनासाठी लसींचा पुरवठा उपलब्ध आहे.