Livestock Vaccination : वासांबे मोहोपाड्यात १९०० जनावरे लसवंत

Animal Care रसायनी परिसरात गाय, म्हैस वर्गात लाळ्या खुरकूत रोगाच्या प्रादुर्भावाच्या पार्श्वभूमीवर बाधित गावांमध्ये नियमित औषधोपचार करण्यात येत आहेत. तसेच या रोगाचा प्रसार नजीकच्या गावांमधील जनावरांना होऊ नये, यासाठी लसीकरण (Animal Vaccination) करण्यात येत आहेत.

रसायनीतील वासांबे मोहोपाडा येथील पशुवैद्यकीय दवाखाना अंतर्गत गावातील जनावरांना मार्च, एप्रिलमध्ये लस दिली आहे. वासांबे मोहोपाडा, चांभार्ली, वडगाव, इसांबे, माझगाव आदी ग्रामपंचायत हद्दीतील सहा महिन्यांवरील गाय आणि म्हैस वर्गातील सुमारे १९०० जनावरांना लस दिल्याचे पशुधन अधिकारी यांनी सांगितले.

लाळ आणि खुरकत या रोगांचे २०३० पर्यंत उच्चाटन करणे हे उद्दीष्ट ठेवून मोहीम सुरू केली. एप्रिलअखेरच्या फेरीमध्ये गाय व म्हैस वर्गातील लहान व मोठ्या जनावरांना लाळ खरकूत रोग प्रतिबंधक लस देण्यात आली आहे.

पावसाळ्यापूर्वी गाय, म्हैस व शेळी वर्गास लसीकरण करण्यात येणार आहे. तसेच जिल्हा पशुविभागाकडून पशुपालकास अनुदानावर १५०० रुपयांचे मर्यादित चारा, बियाणे मोफत खालापूर पंचायत समिती येथे उपलब्ध आहे.

- रमेश चोपडे, पशुवैद्यकीय अधिकारी, वासांबे मोहोपाडा