Pune News : राज्याच्या काही भागात रविवारपासून तीन दिवस पावसाचा अंदाज हवामान विभागाने दिला. संपूर्ण विदर्भ आणि मराठवड्यातील काही जिल्ह्यांमध्ये तुरळक ठिकाणी पावसाचा येलो अलर्ट हवामान विभागाने दिला. 

हवामान विभागाने विदर्भ आणि मराठवड्यातील काही भागात पावसाचा अंदाज दिला. मराठवाड्यातील हिंगोली जिल्ह्यात रविवार, सोमवार आणि मंगळवर आणि नांदेड जिल्ह्यात रविवार आणि सोमवारी विजा आणि ढगांच्या गडगडाटासह हलक्या पावसाचा येलो अलर्ट हवामान विभागाने दिला.

यावेळी ३० ते ४० किलोमीटर प्रतितास वेगाने वारे वाहण्याचाही अंदाज असल्याचे हवामान विभागाने म्हटले आहे. परभणी जिल्ह्यात रविवारी, सोमवारी आणि मंगळवारी तर लातूर जिल्ह्यात रविवारी आणि मंगळवारी आणि धाराशिव जिल्ह्यात मंगळवारी ढगांच्या गडगडाटास काही ठिकाणी हलक्या पावसाचा अंदाज आहे. 

संपूर्ण विदर्भात आजपासून पुढच्या पाच दिवस काही ठिकाणी पावसाचा अंदाज आहे. बुलडाणा, अकोला, अमरावती, अकोला, वाशीम, नागपूर, वर्धा, चंद्रपूर, भंडारा, गोंदीया आणि गडचिरोली जिल्ह्यांमध्ये रविवार, सोमवार आणि मंगळवारी काही ठिकाणी विजा आणि ढगांच्या गडगडाटासह हलक्या पावसाचा येलो अलर्ट हवामान विभागाने वर्तविला.

तसेच सोमवारी आणि मंगळवारी विदर्भातील अनेक जिल्ह्यांमध्ये काही ठिकाणी ३० ते ४० किलोमीटर प्रतितास वेगाने वारे वाहतील, असाही अंदाज हवामान विभागाने दिला.