Weather Forecast : विदर्भ, मराठवाड्यात पावसाला पोषक हवामान

Pune News : जोरदार वाहणाऱ्या वाऱ्यांमुळे राज्याच्या कमाल आणि किमान तापमानात घट झाली आहे. दिवसा उन्हाचा चटका कायम असून सायंकाळनंतर गारठा वाढल्याचे दिसून येत आहे. राज्यात पावसाला पोषक हवामान होत असून, उद्यापासून (ता. २५) विदर्भासह मराठवाड्यात विजांसह पावसाची शक्यता आहे. तर किमान तापमानात पुन्हा वाढ होण्याचा अंदाजही हवामान विभागाने वर्तविला आहे.

शुक्रवारी (ता. २३) हरियाणातील कर्नाल येथे देशाच्या सपाट भूभागावरील नीचांकी ५ अंश सेल्सिअस तापमान नोंदले गेले. उत्तर भारतात १४५ नॉट्स वेगाने जोरदार वारे वाहत असून, महाराष्ट्रातही जोरदार वारे वाहत आहेत.

दक्षिण तेलंगणा आणि परिसरावर चक्राकार वारे वाहत असून, त्यापासून तामिळनाडूपर्यंत हवेचा कमी दाबाचा पट्टा सक्रिय आहे. उद्यापासून (ता. २५) विदर्भात विजांसह पावसाचा इशारा देण्यात आला असून, मराठवाड्यात तुरळक ठिकाणी विजांसह पावसाची शक्यता आहे.

राज्यात बहुतांश ठिकाणी कमाल तापमानाचा पारा ३५ अंशांच्या खाली आला असला तरी उन्हाच्या झळा कायम आहे. शुक्रवारी (ता. २३) सोलापूर येथे राज्यातील उच्चांकी ३५.८ अंश सेल्सिअस तापमानाची नोंद झाली.

निफाड येथील गहू संशोधन केंद्रात राज्यातील नीचांकी ८.८ अंश सेल्सिअस तापमानाची नोंद झाली. आज (ता. २४) कमाल आणि किमान तापमानात चढ-उतार शक्य असल्याचे हवामान विभागाने स्पष्ट केले आहे.

शुक्रवारी (ता. २३) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३२.१ (११.७), नगर ३४.३ (१२.६), धुळे ३२.० (११.६), जळगाव ३१.२ (१३.९), कोल्हापूर ३३.६ (१६.४), महाबळेश्वर २६.८ (१३.०), मालेगाव ३४.० (१४.६), नाशिक २९.१ (१३.०), निफाड ३१.२ (८.८), सांगली ३४.२ (१७.३), सातारा ३२.८ (१३.२), सोलापूर ३५.८ (१८.०), सांताक्रूझ ३०.० (१९.५), डहाणू २९.६ (१८.५), रत्नागिरी ३०.५ (१७.६),

छत्रपती संभाजीनगर ३२.० (१६.०), नांदेड ३२.८ (१६.८), परभणी ३३.६ (१७.१), अकोला ३३.१ (१६.२), अमरावती ३१.४ (१७.५), बुलढाणा २९.६ (१७.०), ब्रह्मपूरी - (१६.२), चंद्रपूर ३५.० (१६.२), गडचिरोली ३४.२ (१६.०), गोंदिया ३१.४ (१६.२), नागपूर ३३.२(१७.०), वर्धा ३३.०(१६.७), वाशीम ३५.६ (१४.६), यवतमाळ ३४.५ (१६.०).