Pune News : माॅन्सूनने आज देशाच्या आणखी काही भागात प्रगती केली. आता माॅन्सूनने देशाचा बहुतांशी भाग व्यापला. तर राज्यातील अनेक ठिकाणी पावसाची हजेरी सुरुच आहे. पुढील ४ दिवस राज्याच्या विविध भागात हलक्या ते मध्यम सरी पडतील, असाही अंदाज हवामान विभागाने दिला. 

राज्यात अनेक ठिकाणी पावसाची हलक्या ते मध्यम स्वरुपाची हजेरी दिसत आहे. हवामान विभागाने आज कोकणात अनेक ठिकाणी जोरदार पावसाचा ऑरेंज अलर्ट दिला. तर मध्य महाराष्ट्रातील सातारा आणि पुणे तसेच संपूर्ण विदर्भ आणि खानदेश तर मराठवाड्यातील छत्रपती संभाजीनगर, जालना, बीड, नांदेड, हिंगोली आणि परभणी जिल्ह्यात ठिकठिकाणी हलक्या ते मध्यम पावसाचा येलो अलर्ट दिला. इतर भागातही हलक्या सरी पडतील, असाही अंदाज हवामान विभागाने दिला.

उद्या कोकण तसेच पुणे सातारा, विदर्भातील अमरावती, यवतमाळ, चंद्रपूर, गडचिरोली, नागपूर, वर्धा आणि भंडारा जिल्ह्यात ठिकठिकाणी हलक्या ते मध्यम पावसाचा येलो अलर्ट दिला. तर राज्यातील इतर जिल्ह्यांमध्ये हलक्या ते मध्यम पावसाच्या सरी पडतील, असाही अंदाज दिला. तसेच पुढील तीन दिवस कोकण आणि विदर्भातील काही भागात पावसाचा जोर अधिक राहण्याची शक्यता आहे. तर राज्याच्या इतर भागात हलक्या पावसाचा अंदाज हवामान विभागाने दिला. 

माॅन्सूनने आज देशाच्या अनेक भागात प्रगती केली. माॅन्सूनने आज संपुर्ण गुजरात आणि अरबी समुद्र व्यापला. तर मध्य प्रदेश, उत्तराखंड, हिमाचल प्रदेश, जम्मू, काश्मीर, लडाख, गिरगीट, बाल्टीस्तान, मुझफ्फराबादचा बहुतांशी भाग व्यापला. तर राजस्थान, उत्तर प्रदेश, बिहारचा आणखी काही भाग व्यापला. माॅन्सूनची सिमा बारमेर, जयपूर, आग्रा, बांदा, सिध्दी, चैबासा, हलदीया, पाकूर, पटना, महाराजगंज, देहरादून, उना, पठाणकोट आणि जम्मू या भागात होती. 

माॅन्सूनच्या प्रवासासाठी पोषक हवामान असून पुढील २ ते ३ दिवसांमध्ये माॅन्सून राजस्थान, हरियाना, पंजाबच्या आणखी काही भागात दाखल होईल. तसेच मध्यम प्रदेश, छत्तीसगड, पश्चिम बंगाल, झारखंड, बिहार, उत्तराखंड, हिमाचल प्रदेश आणि जम्मूचा उर्वरित भाग व्यापेल, असाही अंदाज हवामान विभागाने दिला.