Monsoon Rain : विदर्भ, कोकणात पावसाचा अंदाज; राज्यभरात पुढील ४ दिवस ठिकठिकाणी पावसाची शक्यता

Pune News : माॅन्सूनचा प्रवास आज थबकला होता. तर राज्यात अनेक ठिकाणी हलक्या ते मध्यम सरी पडत आहेत. मात्र सर्वदूर जोरदार पाऊस नाही. हवामान विभागाने राज्यात ठिकठिकाणी पुढील ४ दिवसांमध्ये पाऊस पडू शकतो, असा अंदाज दिला. कोकण आणि घाटमाथ्यावर पावसाचा जोर अधिक राहण्याचा अंदाज आहे. 

हवामान विभागाने काल अरबी समुद्र, गुजरात, मध्य प्रदेश आणि राजस्थानच्या काही भागात प्रगती केली पण आज माॅन्सूनची प्रगती झाली नाही. त्यामुळे माॅन्सूनची सिमा आज मुंद्रा, उदयपूर, शिवपुरी, सिध्दी, चैबसा, हल्दीया, पाकूर, साहीबगंज आणि रक्सौल भागात कायम होती. 

माॅन्सूनच्या प्रगतीसाठी हवामान पोषक आहे. त्यामुळे पुढील ३ ते ४ दिवसांमध्ये माॅन्सून अरबी समुद्र, गुजरात, छत्तीसगड, पश्चिम बंगाल, झारखंड, बिहार आणि मध्य प्रदेशचा उर्वरित भाग व्यापेल. तसेच राजस्थान, उत्तर प्रदेश, उत्तराखंड, हिमाचल प्रदेश, जम्मू आणि काश्मीर, पंजाब आणि हरियाच्या काही भागात दाखल होईल, असाही अंदाज हवामान विभागाने व्यक्त केला. 

हवामान विभागाने राज्यातील अनेक भागात पुढील ४ दिवसांमध्ये पावसाचा अंदाज दिला. आज आणि उद्या कोकण तसेच मध्य महाराष्ट्रातील घाटमाथ्यावर जोरदार पावसाचा अंदाज आहे. तर इतर भागात हलक्या ते मध्यम सरी पडतील. विदर्भातही ठिकठिकाणी पावसाचा अंदाज असून पूर्व विदर्भात पावसाचा जोर अधिक राहण्याची शक्यता आहे. मराठवाड्यातही अनेक ठिकाणी हलक्या ते मध्यम सरी पडतील, असेही हवामान विभागाने म्हटले आहे.