Pune News : उत्तर महाराष्ट्रात किमान तापमानाचा सातत्याने घसरत असून, निफाड येथील गहू संशोधन केंद्रात पारा १२.२ अंशांपर्यंत घसरल्याने हुडहुडी जाणवायला लागली आहे. उर्वरित राज्यातही किमान तापमानात घट होत असतानाच, दक्षिणेकडील जिल्ह्यात मात्र पावासाला पोषक हवामान होत आहे. आज (ता. १२) राज्याच्या तापमानातील चढ-उतार कायम राहण्याची शक्यता आहे.

नैॡत्य बंगालच्या उपसागरात समुद्र सपाटीपासून ५.८ किलोमीटर उंचीवर चक्राकार वाऱ्यांच्या स्थिती आहे. या वाऱ्यांच्या प्रभावामुळे आज (ता. १२) या भागात कमी दाबाचे क्षेत्र तयार होण्याची शक्यता आहे. ही प्रणाली तमिळनाडू आणि श्रीलंकेच्या किनाऱ्याकडे येण्याचे संकेत आहेत. वरील प्रणालीपासून उत्तर आंध्र प्रदेशच्या किनाऱ्यापर्यंत हवेचा कमी दाबाचा पट्टा कायम आहे.

धुळे, नाशिक, महाबळेश्वर, पुणे, अहिल्यानगर, जळगाव येथे पारा १६ अंशांच्या खाली आला आहे. मध्य महाराष्ट्रात पहाटे वेळी गारठा वाढत आहे. राज्यात कमाल-किमान तापमानातील तफावत कायम आहे. सोमवारी (ता. ११) सकाळपर्यंतच्या २४ तासांमध्ये रत्नागिरी येथे उच्चांकी ३५.१ अंश सेल्सिअस तापमानाची नोंद झाली. आज (ता. १२) उत्तर महाराष्ट्रात गारठा कायम असून, तापमानातील चढ-उतार कायम राहणार आहे.

सोमवारी (ता. ११) सकाळी ८.३० वाजेपर्यंतच्या २४ तासांमध्ये नोंदले गेलेले कमाल आणि किमान तापमान (कंसात) तापमान (अंश सेल्सिअस मध्ये) :

पुणे ३०.७ (१५.९), अहिल्यानगर ३०.० (१५.७), धुळे (१३.४), जळगाव ३३.० (१५.४), कोल्हापूर ३१.१ (१९.५), महाबळेश्वर २४.५ (१४.६), मालेगाव ३०.०, नाशिक ३०.७ (१४.१), निफाड ३०.० (१२.२), सांगली ३१.७ (१९.१), सातारा ३०.९ (१८.०), सोलापूर ३४.२ (२०.८), सांताक्रूझ ३४.९ (२२.२), डहाणू ३५.० (१९.४), रत्नागिरी ३५.१ (२२.१), छत्रपती संभाजीनगर ३१.५ (१७.४), धाराशिव (१७.८), परभणी ३०.९ (१७.८), अकोला ३३.४ (२०.४), अमरावती ३३.० (२२.०), बुलडाणा ३०.० (१८.०), ब्रह्मपुरी ३३.२ (१८.७), चंद्रपूर ३१.४ (१७.०), गडचिरोली ३१.६ (१७.६), गोंदिया ३०.९ (१६.८), नागपूर ३१.६ (१७.७), वर्धा ३१.२ (१८.५), वाशीम ३४.२, यवतमाळ ३१.० (१७.५).

१६ अंशापेक्षा कमी तापमान असलेली ठिकाणे : निफाड १२.२, धुळे १३.४, नाशिक १४.१, महाबळेश्वर १४.६, जळगाव १५.४, अहिल्यानगर १५.७, पुणे १५.९.