Pune News : राज्यात उन्हाचा चटका चांगलाच वाढत आहे. बहुतांशी भागात किमान आणि कमाल तापमानात चांगलीच वाढ झाली. मालेगाव येथे मागील २४ तासांमधील सर्वाधिक कमाल तापमानाची नोंद झाली. तर तापमानातील वाढ कायम राहू शकते, असा अंदाज हवामान विभागाने दिला. 

राज्यात पावसाळी वातावरण निवळल्यानंतर कमाल तापमानात चांगलीच वाढ झाली. काही भागात सध्या सकाळी काहीशी थंडी जाणवत असली तरी सरासरी तापमान जास् आहे. राज्यातील बहुतांशी भागात कमाल तापमानाचा पारा ३६ अंश सेल्सिअसच्या पुढे सरकला आहे.

तर गेल्या २४ तासांमध्ये दोन ठिकाणी ४० अंश सेल्सिअस तापमानाची नोंद झाली. मालेगाव येथे राज्यातील सर्वाधिक ४०.८ अंश सेल्सिअस तापमानाची नोंद झाली होती. तर सोलापूर येथे ४० अंश सेल्सिअस तापमान होते, असेही हवामान विभागाने स्पष्ट केले. 

राज्यातील अनेक ठिकाणी कमाल तापमान ३८ अंशाच्या पुढे गेले. त्यामुळे उन्हाचा चटका चांगलाच वाढला. तर चांगलाच घामटाही निघत आहे. राज्यात पुढील पाच दिवस हवामान कोरडे राहण्याचा अंदाज आहे. त्यामुळे उन्हाची ताप चांगलीच वाढू शकते. राज्यात सरासरी तापमानातील वाढ काम राहू शकते, असाही अंदाज हवामान विभागाने दिला.