Pune News: मॉन्सून सक्रिय झाल्याने कोकण, घाटमाथ्यासह विदर्भात मुसळधार पावसाने हजेरी लावली आहे. तर मराठवाडा आणि मध्य महाराष्ट्रात हलका ते मध्यम पाऊस झाला. आज (ता. २५) कोकण, घाटमाथ्यासह पूर्व विदर्भात मुसळधार पावसाची शक्यता असल्याने सावधानतेचा इशारा (रेड अलर्ट) देण्यात आला आहे. कोकण, विदर्भासह राज्यात जोरदार पावसाची शक्यता हवामान विभागाने वर्तविली आहे.

उत्तर बंगालच्या उपसागरात कमी दाबाचे क्षेत्र तयार झाले आहे. ही प्रणाली ठळक होण्याची शक्यता असून, ती पश्‍चिम बंगाल आणि उत्तर ओडिशाच्या किनाऱ्याकडे येण्याची शक्यता आहे. मॉन्सूनचा आस असलेला कमी दाबाचा पट्टा गंगानगर, सिरसा, मेरठ, हर्दोई, पाटणा, जमशेदपूर, दिघा, कमी दाबाचे केंद्र ते उत्तर बंगालच्या उपसागरापर्यंत सक्रिय आहे. विदर्भापासून कमी दाबाच्या केंद्रापर्यंत हवेचा कमी दाबाचा पट्टा सक्रिय आहे. मध्य महाराष्ट्रापासून केरळपर्यंत किनारपट्टीला समांतर कमी दाबाचा पट्टा तयार झाला आहे.

गुरुवारी (ता. २४) सकाळपर्यंतच्या २४ तासांमध्ये विदर्भ, कोकण, घाटमाथा आणि मध्य महाराष्ट्रातील धरणांच्या पाणलोट क्षेत्रामध्ये जोरदार पावसाने हजेरी लावली. मराठवाड्यासह राज्यात तुरळक ठिकाणी हलका ते मध्यम पाऊस झाला. विदर्भाच्या गडचिरोली जिल्ह्यातील मुलचेरा येथे सर्वाधिक २४० मिमी पावसाची नोंद झाली आहे. कमाल तापमानात चढ-उतार सुरूच असून, विदर्भातील ब्रह्मपुरी येथे राज्यातील उच्चांकी ३३.५ अंश सेल्सिअस तापमानाची नोंद झाली.

आज (ता. २५) कोकणातील रायगड, रत्नागिरीसह मध्य महाराष्ट्रातील पुणे घाटमाथा, साताऱ्याच्या घाटमाथ्यावर तसेच विदर्भातील भंडारा, गोंदिया, चंद्रपूर, गडचिरोली या जिल्ह्यांत मुसळधार पावसाची शक्यता असल्याने सावधानतेचा इशारा ‘रेड अलर्ट’ देण्यात आला आहे. मुंबई, ठाणे, सिंधुदुर्ग, कोल्हापूरचा घाटमाथा, वर्धा, नागपूर या जिल्ह्यांत जोरदार पावसाची शक्यता असल्याने दक्षतेचा इशारा (ऑरेंज अलर्ट) आहे. तर पालघर, नाशिक घाटमाथा, सातारा, कोल्हापूर, अमरावती, हिंगोली, नांदेड या जिल्ह्यांत जोरदार सरींची, तसेच जालना, परभणी, बुलडाणा, अकोला, वाशीम, यवतमाळ या जिल्ह्यांत विजांसह पावसाची शक्यता असल्याने दक्षतेचा इशारा (येलो अलर्ट) आहे.

गुरुवारी (ता. २४) सकाळी ८.३० वाजेपर्यंतच्या २४ तासांमध्ये नोंदले गेलेले तापमान (अंश सेल्सिअसमध्ये) :

‎ठिकाणे---तापमान कमाल---तापमान किमान

‎पुणे---२६.९---२१.९

‎‎धुळे---३४.०---२१.५

जेऊर---२९.५---२०.०

‎‎कोल्हापूर---२४.६---२१.६

‎महाबळेश्‍वर---१९.३---१७.०

मालेगाव---२८.६---२१.८

‎‎नाशिक---२७.४---२२.३

निफाड---२८.८---२२.२

‎सांगली---२६.६---२१.९

‎सातारा---२५.७---२१.६

‎सोलापूर---२९.२---२२.४

‎सांताक्रूझ---२७.९---२५.३

डहाणू---३०.३---२५.०

‎रत्नागिरी---२८.२---२४.०

‎छत्रपती संभाजीनगर---२७.६---२२.६

‎धाराशिव---२८.०---२०.०

‎परभणी---३०.९---२२.८

परभणी (कृषी)---३०.९---२२.८

‎‎अकोला---३०.६---२४.४

अमरावती---२८.६---२२.५

भंडारा---३३.०---२३.०

बुलडाणा---२८.०---२२.७

‎ब्रह्मपुरी---३३.५---२४.०

‎चंद्रपूर---२९.८---२४.०

‎गडचिरोली---२९.८---२३.८

‎गोंदिया---३३.३---२४.२

‎नागपूर---३३.४---२४.८

‎वर्धा---३०.५---२४.०

‎वाशीम---२९.०---२३.०

‎यवतमाळ---३२.०---२३.०

मुसळधार पावसाचा इशारा (रेड अलर्ट) :

रायगड, रत्नागिरी, पुणे घाटमाथा, सातारा घाटमाथा, भंडारा, गोंदिया, चंद्रपूर, गडचिरोली.

जोरदार पावसाचा इशारा (ऑरेंज अलर्ट) :

मुंबई, ठाणे, सिंधुदुर्ग, कोल्हापूर घाटमाथा, वर्धा, नागपूर.

जोरदार पावसाचा इशारा (येलो अलर्ट) :

पालघर, नाशिक घाटमाथा, सातारा, कोल्हापूर, अमरावती, हिंगोली, नांदेड.

विजांसह पावसाचा इशारा (येलो अलर्ट) :

जालना, परभणी, बुलडाणा, अकोला, वाशीम, यवतमाळ.