Pune News : पावसाने दडी मारल्यानंतर राज्यात पुन्हा पावसाला पोषक हवामान होत आहे. राज्यात उन्हाचा चटका आणि उकाड्यात वाढ झाली असतानाच विदर्भासह राज्यात तरळक ठिकाणी पावसाने हजेरी लावली आहे. आज (ता. १७) मध्य महाराष्ट्र, मराठवाडा आणि विदर्भात विजांसह पावसाचा इशारा (येलो अलर्ट) हवामान विभागाने दिला आहे.

दक्षिण बांग्लादेश आणि पश्चिम बंगालमध्ये वाहणाऱ्या चक्राकार वाऱ्यांमुळे या भागात कमी दाबाचे क्षेत्र तयार झाले असून, त्याची तीव्रता वाढण्याचे संकेत आहेत. मॉन्सूनचा आस राजस्थानच्या फलोदीपासून, शिवपूरी, सिधी, रांची ते पश्चिम बंगालमधील कमी दाब क्षेत्रापर्यंत सक्रिय आहे.

वायव्य राजस्थान आणि परिसरावर १.५ ते ५.८ किलोमीटर उंचीवर, तसेच दक्षिण केरळ आणि परिसरावर ५.८ किलोमीटर उंचीवर चक्राकार वाऱ्यांची स्थिती आहे. उत्तर कर्नाटक पासून कोमोरिन भागापर्यंत हवेचा कमी दाबाचा पट्टा विस्तारला आहे.

शुक्रवारी (ता. १६) सकाळपर्यंतच्या २४ तासांमध्ये राज्यात उन्हाचा चटका कायम होता. विदर्भात अनेक ठिकाणी तर मराठवाडा, मध्य महाराष्ट्रात तुरळक ठिकाणी हलक्या ते मध्यम सरी कोसळल्या.

कमाल तापमान पुन्हा तिशीपार असून, ब्रह्मपुरी येथे उच्चांकी ३५.६ अंश तापमानाची नोंद झाली. आज (ता. १७) मध्य महाराष्ट्र, मराठवाडा आणि विदर्भात विजांसह पावसाचा इशारा देण्यात आला आहे. उर्वरित राज्यात मुख्यतः उघडिपीसह हलक्या पावसाचा अंदाज हवामान विभागाने वर्तविला आहे.

विजांसह पावसाचा इशारा (येलो अलर्ट) :

सिंधुदुर्ग, जळगाव, नगर, पुणे, सातारा, सोलापूर, सांगली, कोल्हापूर, छत्रपती संभाजीनगर, जालना, बीड, परभणी, हिंगोली, धाराशिव, लातूर, नांदेड, बुलढाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली.