Pune News : राज्यात पावसाला पोषक हवामान असल्यामुळे आकाश ढगाळ होत आहे. किमान तापमानात वाढ झाल्याने थंडी कमी झाली आहे. आज (ता. ५) राज्यात तुरळक ठिकाणी हलक्या पावसाचा अंदाज आहे. तर किमान तापमानात चढ-उतार होण्याची शक्यता हवामान विभागाने वर्तविली आहे.

उत्तर भारतात थंडीची लाट आल्याने, गुरुवारी (ता. ४) राजस्थानमधील सिकार येथे देशाच्या सपाट भूभागावरील नीचांकी १ अंश सेल्सिअस तापमान नोंदले गेले. पंजाब, हरियाना, चंडीगड, उत्तर प्रदेश, राजस्थानमध्ये अनेक भागांत किमान तापमान ४ ते ८ अंशांच्या दरम्यान होते. तर पंजाब हरियाना, राजस्थानमध्ये तीव्र थंडीची लाट कायम राहण्याची शक्यता आहे.

किमान तापमानात वाढ झाल्याने राज्यातील थंडी कमी झाली आहे. गुरुवारी (ता. ४) निफाड येथील गहू संशोधन केंद्र व गोंदिया येथे राज्यातील नीचांकी १३.५ अंश सेल्सिअस तापमानाची नोंद झाली. उर्वरित राज्यात किमान तापमान १४ ते २० अंशांच्या दरम्यान आहे. आज (ता. ५) राज्याच्या किमान तापमानात चढ-उतार होण्याची शक्यता कायम आहे.

आग्नेय अरबी समुद्रातील कमी दाबाचे क्षेत्र निवळले असून, लक्षद्वीप बेटांजवळ चक्राकार वाऱ्याची स्थिती आहे. त्यापासून दक्षिण कर्नाटकपर्यंत हवेचा कमी दाबाचा पट्टा कायम आहे. उत्तर कर्नाटकपासून उत्तर प्रदेशपर्यंत चक्राकार वाऱ्यांपर्यंत हवेचा कमी दाबाचा पट्टा तयार झाला आहे. यामुळे राज्यात पावसाला पोषक हवामान झाले आहे. आज (ता. ५) तुरळक ठिकाणी पावसाची शक्यता आहे.

गुरुवारी (ता. ४) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे ३०.६ (१५.९), धुळे ३० (१३.६), जळगाव २९.३ (१६.९), कोल्हापूर २९.५ (१९.७), महाबळेश्वर २५.९ (१५.५), नाशिक २८.९ (१५.९), निफाड २८.८ (१३.५), सांगली २९.६ (१९.९), सातारा ३०.३ (१६.५), सोलापूर ३२ (१९), सांताक्रूझ ३०.९ (१९), डहाणू २६.३ (१८.५), रत्नागिरी ३३.५ (२१.२),

छत्रपती संभाजीनगर २८.५ (१६.४), नांदेड २८.८ (१७.८), परभणी २९.६ (१६.४), अकोला ३०.१ (१७.५), अमरावती २८.८ (१७.१), बुलडाणा २८ (१७.५), ब्रह्मपुरी ३१.३ (१५.४), चंद्रपूर २८.६ (१५.२), गडचिरोली २७.४ (१४.८), गोंदिया २९ (१३.५), नागपूर २७.८ (१६.०), वर्धा २८ (१६), वाशीम २८.४ (१४.८), यवतमाळ ३०.४ (१७.५).