Cloudy Weather : ढगाळ वातावरणाने चिंता

Jalgaon News : खानदेशात मागील दोन-तीन दिवसांपासून ढगाळ वातावरण आहे. केळी, कलिंगड व इतर फळे, भाजीपाला उत्पादक शेतकऱ्यांमध्ये पाऊस व नुकसानीची भीती आहे. निरभ्र वातावरणाची आळवणी शेतकरी करीत आहेत.

खानदेशात यंदा थंडी कमी असल्याने किमान तापमान एक दिवसही सात अंश सेल्सिअसपर्यंत गेलेले नाही. सातपुड्यातही थंडीचे आगमन यंदा हवे तसे झालेले नाही. अनेकदा डिसेंबरच्या अखेरीस किंवा जानेवारीत सातपुड्यात दवबिंदू गोठविणारी थंडी असते. अक्कलकुव्यातील दाब व परिसरात किमान तापमान दोन अंश सेल्सिअसखाली पोचते. परंतु यंदा कुठेही हुडहुडी भरविणारी थंडी नाही. यातच ढगाळ वातावरण सतत तयार होत आहे.

नोव्हेंबरच्या शेवटच्या आठ-नऊ दिवसांत सतत ढगाळ व पावसाळी वातावरण होते. नंदुरबारातील २५ महसूल मंडलांत त्या वेळेस अतिवृष्टी झाली. जळगाव व धुळ्यातही अनेक भागात पाऊस झाला होता. नंदुरबारात काही भागात वादळ व गारपिटीने हानी झाली. यानंतर डिसेंबरमध्ये काही दिवस निरभ्र वातावरण होते.

परंतु अधूनमधून ढगाळ वातावरण तयार होतच राहिले. यामुळे थंडीला अडथळा आला. रब्बी हंगामात गहू, हरभरा, दादर ज्वारी व इतर पिकांसाठी थंडी आवश्यक आहे. परंतु यंदा सलग चार, पाच दिवस किमान तापमान ९-१० अंश सेल्सिअसखाली आलेच नाही. यामुळे रब्बी हंगाम हवा तसा नाही, असे शेतकऱ्यांचे म्हणणे आहे.

केळी, पपईची काढणी सुरू आहे. अनेकांची केळी निसवणीवर आहे. कलिंगड, कारली, गिलके, खरबूज आदी वेलवर्गीय पिकांची लागवडदेखील झाली आहे. यंदा कलिंगडाची लागवडदेखील अनेक भागांत प्रतिकूल स्थितीमुळे कमी झाली आहे. परंतु काही शेतकऱ्यांनी हिमतीने लागवड करून पीक वाढविले आहे.

सकाळपासून सुसाट वारे

खानदेशात मागील दोन-तीन दिवसांपासून ढगाळ वातावरण असते. दुपारी सुसाट वारा सुटतो. पहाटेदेखील वारा असतो. यामुळे शेतकरी निरभ्र वातावरणाची आळवणी, प्रतीक्षा करीत आहेत. निरभ्र वातावरणात थंडीही वाढेल व पिकांवरही प्रतिकूल परिणाम कमी होतो, असे शेतकऱ्यांचे म्हणणे आहे.