Weather update today : राज्याच्या अनेक भागात दोन दिवसांपासून पाऊस पडत आहे. पावसामुळे काही ठिकाणी पूरस्थिती देखिल निर्माण झाली. राज्यभरात हलक्या ते मध्यम सरी पडत असल्याने शेतकऱ्यांना काहीसा दिलासा मिळत आहे. तसेच उद्यापासून पुढचे चार दिवसही राज्याच्या अनेक भागात पावसाची शक्यता आहे. 

राज्यभरात बहुतांशी ठिकाणी आज हलक्या ते मध्यम स्वरुपाचा पाऊस झाला. विदर्भ, मराठवाडा, खानदेश आणि मध्य महाराष्ट्रातील अनेक भागात पावसाच्या जोरदार सरी पडत आहेत. दुपारनंतर अनेक भागात पावसाचा जोर वाढला होता. तर काही ठिकाणी पूर आल्याने पिकांमध्ये पाणी साचले. काही ठिकाणी पीकही वाहून गेल्याचे शेतकऱ्यांनी सांगितले. दुपारनंतर राज्यातील अनेक भागात पाऊस सुरुच होता, अशी माहिती मिळाली होती.

हवामान विभागाने उद्याही राज्याच्या काही भागात पावसाचा अंदाज दिला. उद्या संपूर्ण विदर्भात ठिकठिकाणी जोरदार पावसाचा येलो अलर्ट आहे. तर मराठवड्यातील छत्रपती संभाजीनगर, जालना, बीड, परभणी, नांदेड तसेच खानदेशातील जळगाव, मध्य महाराष्ट्रातील नाशिक, नगर, पुणे आणि कोकणातील रागयड आणि ठाणे जिल्ह्यातही ठिकठिकाणी जोरदार पावसाचा येलो अलर्ट हवामान विभागाने दिला.

सोमवारी विदर्भातील यवतमाळ, वर्धा, नागपूर, चंद्रपूर, गडचिरोली, भंडारा आणि गोंदीया जिल्ह्यांना जोरदार पावसाचा येलो अलर्ट आहे. तर मराठवड्यातील छत्रपती संभाजीनगर, बीड आणि जालना तर जळगावसह मध्य महाराष्ट्रातील नाशिक, नगर आणि पुणे तसेच कोकणातही ठिकठिकाणी जोरदार पावसाचा येलो अलर्ट हवामान विभागाने दिला. मंगळवारी आणि बुधवारीही राज्याच्या अनेक भागात जोरदार सरी पडतील, असाही अंदाज हवामान विभागाने दिला.