Pune News : राज्याच्या अनेक भागात सध्या पावसाचा जोर कमी झाला आहे. मराठवाड्यात ४ ते ५ दिवस जोरदार पावसाने हजेरी लावल्यानंतर बहुतांशी भागात उघाडीप आहे. मात्र विदर्भ आणि कोकणात पावसाचा जोर काहीसा अधिक आहे. हवामान विभागाने पुढील पाच दिवस विदर्भासह राज्याच्या इतर भागात जोरदार पावसाचा अंदाज दिला. 

हवामान विभागाने आजपासून पुढील ५ दिवस विदर्भातील बुलडाणा, अमरावती, अकोला, यवतमाळ, वाशीम, वर्धा, नागपूर, चंद्रपूर, भंडारा, गोंदीया आणि गडचिरोली जिल्ह्यात काही ठिकाणी जोरदार पावसाचा येलो अलर्ट दिला.

तर कोकणातील सिंधुदूर्ग, रत्नागिरी आणि रायगड जिल्ह्यातही शनिवारपासून काही ठिकाणी जोरदार पावसाचा अंदाज आहे. तसेच पुणे आणि सातारा जिल्ह्यातील घाटमाथ्यावरही पुढील ५ दिवस काही ठिकाणी जोरदार पावसाचा अंदाज हवामान विभागाने दिला.

पुढील ५ दिवस मराठवाड्यातील काही जिल्ह्यांमध्येही पावसाचा अंदाज आहे. आज धाराशिव, लातूर, नांदेड आणि हिंगोली जिल्ह्यात काही ठिकाणी विजांसह पावसाचा अंदाज हवामान विभागाने दिला.

तर उद्या जालना, परभणी आणि हिंगोली जिल्ह्यात पावसाचा अंदाज आहे. शनिवारी बीड, परभणी आणि हिंगोली जिल्ह्यात तर रविवारी परभणी, नांदेड आणि हिंगोली जिल्ह्यात काही ठिकाणी विजांसह पावसाची शक्यता हवामान विभागाने वर्तविली. तसेच बीड, धाराशिव, लातूर, नांदेड आणि हिंगोली जिल्ह्यातही काही ठिकाणी विजांसह जोरदार पावसाचा अंदाज हवामान विभागाने दिला.