Pune News : राज्यात उघडीप देणाऱ्या पावसाला पोषक हवामान होत आहे. तुरळक ठिकाणी विजांसह पावसाने हजेरी लावली आहे. यातच राज्यात उन्हाचा चटका वाढला असून, उकाड्यामुळे घामटा वाढला आहे. आज (ता. २१) मराठवाड्यात वादळी वारे, विजांसह पावसाची शक्यता असल्याने सतर्कतेचा इशारा (येलो अलर्ट) देण्यात आला. मध्य महाराष्ट्रात तुरळक ठिकाणी विजांसह पावसाची शक्यता हवामान विभागाने वर्तविली आहे.

मॉन्सूनचा आस असलेला कमी दाबाचा पट्टा बिकानेर, शिवपुरी, सिधी, जमशेदपूर, दिघा ते पूर्व - मध्य बंगालच्या उपसागरापर्यंत सक्रिय आहे. उत्तर अंदमान समुद्रात आज (ता २१) चक्राकार वाऱ्यांची स्थिती तयार होणार असून, सोमवारपर्यंत (ता. २३) या भागात कमी दाबाचे क्षेत्र तयार होण्याचे संकेत आहेत.

पावसाच्या दडीने कमाल तापमानाचा पारा वाढू लागला आहे. शुक्रवारी (ता. २०) सकाळपर्यंतच्या २४ तासांमध्ये मध्य महाराष्ट्रातील जेऊर येथे राज्यातील उच्चांकी ३६.५ अंश सेल्सिअस तापमानाची नोंद झाली. तर सोलापूर येथे ३५.६ अंश तापमान नोंदले गेले. अनेक ठिकाणी तापमान ३२ अंशांच्या पुढे गेल्याने उन्हाचा चटका तापदायक ठरत असून, उकाड्याने घामटा निघत आहे.

राज्यात पावसाला पोषक हवामान झाल्याने आकाश वादळी पावसाचे ढग गोळा होत आहे. आज (ता. २१) मराठवाड्यात वादळी वारे, विजांसह पावसाचा इशारा देण्यात आला आहे. उर्वरित मराठवाडा, मध्य महाराष्ट्रात तुरळक ठिकाणी विजांसह पावसाची शक्यता आहे, तर विदर्भ, कोकणात तुरळक ठिकाणी हलक्या पावसाचा शक्यता हवामान विभागाने वर्तविली आहे.

विजांसह वादळी पावसाचा इशारा (येलो अलर्ट) :

बीड, धाराशिव, लातूर, परभणी, हिंगोली, नांदेड.

विजांसह पावसाची शक्यता :

जळगाव, नाशिक, नगर, पुणे, सातारा, सोलापूर, छत्रपती संभाजीनगर, जालना.