बंगालच्या उपसागरातील ‘मिगजौम’ चक्रीवादळ निवळलं आहे. तरीही राज्यात ढगाळ हवामान आहे. तर राज्यातील किमान आणि कमाल तापमानात चढ उतार सुरूच आहेत. देशातील विविध भागात पुढील दोन दिवस पावसाला पोषक स्थिती आहे.

तर विदर्भातील काही जिल्ह्यात तुरळक ठिकाणी हलक्या सरी हजेरी लावण्याची शक्यता आहे. तर उर्वरित राज्यात कोरड्या हवामानासह किमान आणि कमाल तापमान चढ-उताराची शक्यता हवामान विभागाने व्यक्त केली आहे.

विदर्भातील अकोला, अमरावती, भंडारा, बुलढाणा, चंद्रपुर, गडचिरोली, गोंदिया, नागपूर, वर्धा, वाशिम आणि यवतमाळ जिल्ह्यात तुरळक ठिकाणी पावसाची भुरभुर हजेरी लावण्याची शक्यता हवामान विभागाने वर्तवली आहे. 

देशाच्या दक्षिण भागात पुढील चार ते पाच दिवस पावसाला पोषक स्थिती निर्माण झाली आहे. तर ८ ते १० तारखेच्या दरम्यान केरळमध्ये तसेच ८ आणि ९ तारखेला तामिळनाडूमध्ये मुसळधार पावसाची शक्यता हवामान विभागाने वर्तवली आहे. 

आज सकाळपासून काही भागात धुक्याचं साम्राज्य पसरलेलं होतं. तर गुरुवारी विविध भागात हलक्या सरीने हजेरी लावली होती. हवामान विभागाने कमाल आणि किमान तापमानातील चढ-उतार कायम राहण्याचा अंदाज दिला आहे.