Pune News : राज्यातील तापमानात सध्या चढ उतार होताना दिसत आहेत. काही भागात काही वेळ ढगाळ वातावरण दिसत आहे. मात्र पावसाने हजेरी लावल्याची नोंद नाही. राज्याच्या काही भागात शनिवारी पाऊस पडू शकतो, असा अंदाज हवामान विभागाने वर्तविला.

राज्यात सकाळी वातावरणात थंडी जाणवत आहे. तर काही भागात दुपारी उन्हाचा चटकाही जाणवत आहे. पण मागील दोन दिवसांपासून पावसाची नोंद नव्हती. पण हवामान विभागाने सिंधुदूर्ग जिल्ह्यात काही ठिकाणी शनिवारी आणि रविवारी विजा आणि ढगांच्या गडगडाटासह पावसाचा अंदाज हवामान विभागाने दिला.

तसेच यावेळी ३० ते ४० किलोमीटर प्रतितास वेगाने वारे वाहण्याची शक्यता आहे. तर रत्नागिरी जिल्ह्यात विजांसह काही ठिकाणी हलक्या सरी पडू शकतात, असाही अंदाज हवामान विभागाने दिला.

सध्या श्रीलंका आणि शेजारच्या भागात चक्राकार वाऱ्याची स्थिती आहे. ही स्थिती १.५ किलोमीटर उंचीवर आहे. तर पश्चिमी विक्षोप सध्या ५.८ किलोमीटर उंचीवर आहे. पश्चिम विक्षोपाचा परिणाम हिमालयाच्या पूर्वेकडील भागावर ७ नोव्हेंबरच्या रात्रीपासून दिसू शकतो, असाही अंदाज हवामान विभागाने दिला. आज तमिळनाडू, पुद्दूचेर्री, कराईकल, केरळ, तेलंगणा आणि कर्नाटक च्या काही भागात पाऊस पडला.