IMD Alert : राज्यात सकाळीच्या हवेत चांगलाच गारवा जाणवत आहे. तर दुपारी उन्हाचा चटका नकोसा होत आहे. रब्बीच्या पेरणीसाठी काही भागात आता शेतकऱ्यांना पावसाची आवश्यकता आहे. पण दोन दिवस तरी कुठेही पावसाचा अंदाज नाही. मात्र सोमवारपासून राज्यातील काही जिल्ह्यांमध्ये पावसाची शक्यता आहे.

राज्यात आता थंडी पडायला सुरुवात झाली. मागील दोन दिवसांमध्ये हवेतील गारवा चांगलाच वाढला होता. दिपारी मात्र उन्हाचा चटका जाणवतोय. पुढील काही दिवसांमध्ये थंडी आणखी तीव्र होण्याचे संकेत आहेत. राज्यात मागील काही आठवड्यांपासून पावसाने पाठ फिरवली आहे. परतीचा पाऊसही अपेक्षेप्रमाणे झाला नाही. त्यामुळे रब्बीसाठी पावसाची गरज आहे. पण उद्याही राज्यात हवामान कोरडेच राहण्याचा अंदाज आहे.

सोमवारी मात्र राज्यातील काही भागात पावसाचा अंदाज आहे. सोमवारी सिंधुदूर्ग जिल्ह्यात वादळी विजा आणि ढगांच्या गडगडाटासह हलक्या ते मध्यम पावसाचा येलो अलर्ट देण्यात आला. तर यावेळी ३० ते ४० किलोमीटर प्रतितास वेगाने वारे वाहण्याचा अंदाज आहे. तसेच कोल्हापूर आणि सातार जिल्ह्यातही काही ठिकाणी हलक्या सरी पडतील, असा अंदाजही हवामान विभागाने दिला. तसेच मंगळवारीही सिंधुदूर्ग जिल्ह्यात येलो अलर्ट देण्यात आला. तर रत्नागिरी, कोल्हापूर आणि सातारा या जिल्ह्यांमध्ये हलक्या ते मध्यम पावसाचा अंदाजही हवामान विभागाने दिला.