Pune News : राज्यातील बहुतांश भागात पहाटे थंडीचा कडाका जाणवू लागला आहे. तर दुपारी उन्हाचा चटकाही जाणवत आहे. राज्यातील तापमानात चढ उतार सुरू आहे. हवामानशास्त्र विभागाने पुढील पाच दिवसांचा अंदाज जाहीर केला आहे. राज्यातील काही भागात गुरुवारपासून पावसाचा अंदाज हवामानशास्त्र विभागाने दिला आहे. 

सध्या बुधवारपर्यंत संपूर्ण राज्यात कोरडं हवामान राहील. तर गुरुवारपासून म्हणजेच १४ नोव्हेंबरपासून मात्र रायगड, रत्नागिरी, सिंधुदुर्ग, पुणे, सातारा, सोलापूर जिल्ह्यात तुरळक ठिकाणी हलक्या सरी हजेरी लावण्याची शक्यता आहे.

तसेच कोल्हापूर, कोल्हापूर घाट, सांगली जिल्ह्यात तुरळक ठिकाणी जोरदार पावसाचा येलो अलर्ट हवामान विभागाने दिला आहे. तर शुक्रवारी सिंधुदुर्ग, कोल्हापूर, सातारा, सांगली जिल्ह्यात काही भागात मध्यम ते जोरदार पावसाची शक्यता असून उर्वरित राज्यात मात्र प्रामुख्याने कोरडे हवामान राहील, असा अंदाज हवामानशास्त्र विभागाने वर्तवला आहे.

कोकणात उन्हाचा पारा चढला आहे. त्यासोबतच गारठा वाढला आहे. उत्तर महाराष्ट्रातील किमान तापमानाचा पारा १३ अंश सेल्सियसपर्यंत खाली घसरला आहे. त्यामुळे उत्तर महाराष्ट्रात थंडीचा जोर वाढला आहे. उर्वरित राज्यात मात्र कडाक्याच्या थंडीची प्रतीक्षा आहे. 

पुढील चोवीस तासात नैऋत्य बंगालच्या उपसागरा कमी दाबाचा पट्टा तयार होण्याची शक्यता आहे. पुढील दोन दिवसात कमी दाब क्षेत्र तामिळनाडूकडे सरकण्याची शक्यता आहे. त्यामुळे केरळ, तामिळनाडू आणि आंध्रप्रदेशच्या किनारपट्टीच्या भागात पावसाची शक्यता हवामान विभागाने वर्तवली आहे. तर कोकण, मध्य महाराष्ट्रात गुरुवारपासून पाऊस हजेरी लावण्याची शक्यता आहे. त्यामुळे काढणी केलेला शेतमाल सुरक्षित जागेवर शेतकऱ्यांनी ठेवावा. तसेच कापणी केलेली पिकांची काढणी करून घ्यावी, असा सल्लाही हवामान विभागाने दिला आहे.