Pune News : विदर्भ, मराठवाड्यात तुरळक ठिकाणी वादळी पाऊस आणि गारपिटीने तडाखा सुरूच आहे. उन्हाची ताप वाढल्याने उकाडा त्रासदायक ठरत आहे. आज (ता. १९) विदर्भ, मराठवाड्यात वादळी वाऱ्यासह पाऊस, गारपिटीचा इशारा कायम असल्याचे हवामान विभागाने म्हटले आहे. उर्वरित राज्यात ढगाळ हवामानासह उन्हाचा चटका कायम राहण्याची शक्यता आहे.

विदर्भ आणि परिसरावर समुद्रसपाटीपासून १.५ किलोमीटर उंचीवर चक्राकार वारे वाहत आहेत. या चक्राकार वाऱ्यांपासून दक्षिण तमिळनाडू पर्यंत हवेचा कमी दाबाचा पट्टा सक्रिय आहे. यामुळे रविवारी (ता. १७) विदर्भ, मराठवाड्यात ढगाळ हवामानासह वादळी पाऊस गारपिटीने हजेरी लावली आहे.

आज (ता. १९) पूर्व विदर्भातील नागपूर, भंडारा, गोंदिया, चंद्रपूर जिल्ह्यात वादळी पाऊस, गारपिटीचा इशारा (ऑरेंज अलर्ट) देण्यात आला आहे. उर्वरित विदर्भासह मराठवाड्यात तुरळक ठिकाणी वादळी पावसाचा इशारा (येलो अलर्ट) देण्यात आला आहे.

सोमवारी (ता. १८) सकाळपर्यंतच्या २४ तासांत सोलापूर येथे राज्यातील उच्चांकी ३९.८ अंश सेल्सिअस तापमानाची नोंद झाली. तर वाशीम येथे पारा ३९ अंशांपार कायम असून, उर्वरित राज्यात उन्हाचा चटका कायम असला तरी तापमानात चढ-उतार सुरूच आहे. पावसाची उघडीप असलेल्या भागात उन्हाची ताप कायम राहण्याची शक्यता आहे.

सोमवारी (ता. १८) सकाळपर्यंतच्या २४ तासांमध्ये नोंदले गेलेले कमाल तापमान (अंश सेल्सिअस मध्ये) :

पुणे ३६.०, धुळे ३६.०, जळगाव ३७.७, कोल्हापूर ३६.२, महाबळेश्वर ३०.४, नाशिक ३४.८, निफाड ३६.०, सांगली ३६.९, सातारा ३६.६, सोलापूर ३९.८, सांताक्रूझ ३२.५, डहाणू ३१.३, रत्नागिरी ३१.३,

छत्रपती संभाजीनगर ३६.२, नांदेड ३६.६, परभणी ३६.९, अकोला ३७.९, अमरावती ३७.६, बुलडाणा ३६.४, ब्रह्मपुरी ३९.०, चंद्रपूर ३७.२, गडचिरोली ३६.०, गोंदिया ३५.०, नागपूर ३६.२, वर्धा ३७.०, वाशीम ३९.०, यवतमाळ ३७.७.

वादळी पाऊस, गारपिटीचा इशारा (ऑरेंज अलर्ट) :

नागपूर, भंडारा, गोंदिया, चंद्रपूर.

वादळी पावसाचा गारपिटीचा इशारा (येलो अलर्ट) :

बुलडाणा, अकोला, अमरावती, वाशीम, यवतमाळ, वर्धा, गडचिरोली, नांदेड, लातूर.