Maharashtra Weather Update : हिमालयाच्या पायथ्याकडे कायम असलेला मॉन्सूनचा आस, पावसासाठी पोषक प्रणालींच्या अभावामुळे राज्याच्या अनेक भागांत पावसाची दडी कायम आहे.

आज (ता. १३) कोकणातील रायगड आणि रत्नागिरी जिल्ह्यांत तुरळक ठिकाणी जोरदार पावसाचा अंदाज आहे. उर्वरित राज्यात आकाश ढगाळ राहून, हलक्या पावसाचा अंदाज हवामान विभागाने वर्तविला आहे.

ईशान्य उत्तर प्रदेश आणि परिसरावरील चक्राकार वाऱ्यांची स्थिती निवळली आहे. मॉन्सूनचा आस असलेला कमी दाबाचा पट्टा त्याच्या सर्वसाधारण स्थितीच्या उत्तरेकडे कायम असून, त्याचे पूर्व टोक बहारिच, सीतामढी, किसानगंज ते मणिपूरपर्यंत सक्रिय आहे.

सिक्कीमपासून वायव्य बंगालच्या उपसागरापर्यंत, तसेच दक्षिण अंतर्गत कर्नाटकपासून कोमोरीन भागापर्यंत आणखी एक कमी दाबाचा पट्टा सक्रिय आहे.

राज्यात मॉन्सून कमजोर असला, तरी तुरळक ठिकाणी हलक्या सरी कोसळत आहेत. अनेक भागांत मुख्यतः पावसाची उघडीप आहे.

ढगाळ हवामानासह उकाडा कायम असून, ऊन-सावल्यांचा खेळ सुरू आहे. आज (ता. १३) कोकणातील रायगड, रत्नागिरी जिल्ह्यांत तुरळक ठिकाणी जोरदार पावसाची शक्यता आहे. तर उर्वरित राज्यात मुख्यतः पावसाच्या उघडिपीसह तुरळक ठिकाणी हलक्या सरींचा अंदाज हवामान विभागाने वर्तविला आहे.