Monsoon Maharashtra : आज राज्याच्या बहुतांशी भागात पावसाची उघडीप होती. काही ठिकाणी हलक्या सरी पडल्या. मात्र जोरदार पावसाने आज पाठ फिरवलेली दिसली. दुपारी अनेक भागात उन्हाचा चटकाही जाणवला. आज काही भागांमध्ये जोरदार पावसाचा अंदाज हवामान विभागाने वर्तविला. त्यामुळे खरिपाच्या पेरण्यांनी वेग घेतला.

वायव्य राजस्थान आणि शेजारच्या भागात कमी दाबाचे क्षेत्र तयार झाले आहे. हे कमी दाबाचे क्षेत्र समुद्रसापाटीपासून ४.५ किलोमीटर उंचीवर आहे. राज्याच्या काही भागात जोरदार पावसाला पोषक हवामान आहे. माॅन्सूनचा आस असलेला कमी दाबाचा पट्टा सर्वसाधारण स्थितीपेक्षा दक्षिणेकडे झुकलेला आहे. कमी दाबाचा पट्टा बिकानेरकडे सरकत आहे. तर कमी दाबावाचे क्षेत्र वायव्य राजस्थान आणि शेजारच्या भागात आहे.

लखनऊ, पटना, बालूरघाट आणि पूर्व मनिपूर भागात कमी दाब क्षेत्राचा पट्टा आहे. पूर्वकडून वाहणारे वारे समुद्रसपाटीपासून ५.१ ते ९.५ किलोमीटर उंचीवर आहेत.  किनारपट्टीला समांतर कमी दाबावाचा पट्टा दक्षिण गुजरातपासून उत्तर केरळपर्यंत विस्तारला आहे. क्षिणेकडे आलेला माॅन्सूनचा आस  आणि किनारपट्टीलगत चक्राकार वारे यामुळे राज्याच्या काही भागात पावसाची शक्यता आहे.

राज्याच्या बहुतांशी भागात पावसाचा जोर ओसरला. आज काही भागांमध्ये हलक्या सरी पडल्या. तर काही भागांमध्ये ढगाळ वातावरण होते. दुपार सर्वच भागात उन्हाचा चटकाही जाणवला. हवामान विभागाने आज कोकणातील सिंधुदुर्ग आणि रत्नागिरी तर संपूर्ण विदर्भात ठिकठिकामी जोरदार पावसाचा अंदाज व्यक्त केला. मध्य महाराष्ट्र, मराठवाडा आणि खानदेशात काही ठिकाणी हलक्या पावसाचा अंदाज दिला.