Pune News : राज्यातील बहुतांशी भागात मागील काही दिवसांपासून कमी अधिक प्रमाणात पाऊस पडत आहे. पुढील पाचही दिवस राज्यात पाऊस हजेरी लावू शकतो. आज राज्यतील बहुतांशी ठिकाणी पावसाचा अंदाज आहे. पण मराठवाडा आणि खानदेश तसेच मध्य महाराष्ट्रातील काही भागात पावसाचा जोर कमी राहू शकतो, असा अंदाज हवामान विभागाने दिला. 

हवामान विभागाने आज कोकणातील सर्व जिल्हे आणि मध्य महाराष्ट्रातील कोल्हापूर आणि सातारा तसेच विदर्भातील यवतमाळ, वर्धा आणि अमरावती या ११ जिल्ह्यांमध्ये काही ठिकाणी जोरदार ते अतिजोरदार पावसाचा अंदाज हवामान विभागाने दिला. तर विदर्भातील उरलेल्या ८ जिल्ह्यांमध्ये, खानदेशातील तीन जिल्हे, मराठवाड्यातील ८ जिल्हे आणि मध्य महाराष्ट्रातील पुणे, नगर आणि नाशिक जिल्ह्यातही काही ठिकाणी जोरदार पावसाचा येलो अलर्ट देण्यात आला. 

उद्या कोकण तसेच मध्यम महाराष्ट्रातील घाटमाथ्यावर काही ठिकाणी जोरदार ते अतिजोरदार पावसाचा अंदाज आहे. तसेच संपूर्ण विदर्भात काही ठिकाणी जोरदार पावसाचा अंदाज व्यक्त करण्यात आला. मराठवाडा आणि खानदेश तसेच मध्य महाराष्ट्रातील इतर जिल्ह्यांमध्ये पावसाचा जोर कमी होण्याची शक्यता आहे. 

गुरुवारी सिंधुदूर्ग, रत्नागिरी, कोल्हापूर आणि सातारा जिल्ह्यात काही ठिकाणी जोरदार ते अतिजोरदार पावसाचा ऑरेंज अलर्ट हवामान विभागाने दिला. तर पुणे, रायगड, पालघर, ठाणे तसेच संपूर्ण विदर्भाला काही ठिकाणी जोरदार पावसाचा येलो अलर्ट आहे. 

शुक्रवारी कोकण आणि मध्य महाराष्ट्र, संपूर्ण विदर्भात काही ठिकाणी जोरदार ते अतिजोरदार पावसाचा अंदाज आहे. तर मराठवाडा आणि खानदेशात काही ठिकाणी हलक्या ते मध्यम सरी पडतील, असाही अंदाज हवामान विभागाने दिला. शनिवारी कोकण, मध्य महाराष्ट्र, मराठवाडा, खानदेश आणि विदर्भात अनेक ठिकाणी जोरदार पावसाचा अंदाज हवामान विभागाने दिला.