Pune News: उन्हाच्या चटक्यानंतर राज्यात पुन्हा पावसाला पोषक हवामान होत आहे. कोकण, मध्य महाराष्ट्रासह विदर्भात पाऊस वाढण्याची शक्यता आहे. आज (ता. २३) कोकण, घाटमाथ्यावर मुसळधार पावसाची शक्यता असल्याने दक्षतेचा इशारा ‘ऑरेंज अलर्ट’ देण्यात आला आहे. तर उर्वरित कोकणासह, मराठवाडा आणि विदर्भात जोरदार पावसाच्या सरींची शक्यता असल्याने दक्षतेचा इशारा (येलो अलर्ट) हवामान विभागाने दिला आहे.

मॉन्सूनचा आस असलेला कमी दाबाचा पट्टा पुन्हा दक्षिणेकडे येत सर्वसाधारण स्थितीवर आला असून, राजस्थानच्या गंगानगरपासून रोहतक, लखनौ, वाराणसी, दाल्तोंगंज, जमशेदपूर ते ईशान्य बंगालच्या उपसागरापर्यंत सक्रिय आहे. दक्षिण कर्नाटक ते आंध्र प्रदेशच्या किनाऱ्यादरम्यान पूर्व आणि पश्चिमेकडून वाहणाऱ्या वाऱ्यांचे जोडक्षेत्र कायम आहे.

आंध्र प्रदेश आणि दक्षिण ओडिशा किनाऱ्यालगत चक्राकार वाऱ्यांची स्थिती आहे. ‘विफा’ चक्रीवादळाचे अवशेष बंगालच्या उपसागरात आल्याने या भागात उद्यापर्यंत (ता. २४) कमी दाबाचे क्षेत्र तयार होण्याचे संकेत आहेत. मंगळवारी (ता. २२) सकाळपर्यंतच्या २४ तासांमध्ये मुंबईसह कोकण, मध्य महाराष्ट्राच्या घाटमाथ्यावर मध्यम ते जोरदार पावसाने हजेरी लावली आहे. पूर्व विदर्भातील तुरळक ठिकाणी हलका ते मध्यम पावसाने हजेरी लावली.

पावसाची उघडीप असलेल्या भागात उन्हाचा चटका आणि उकाडा कायम आहे. विदर्भातील अकोला येथे राज्यातील उच्चांकी ३५.७ अंश सेल्सिअस तापमानाची नोंद झाली. ‎वर्धा येथे ३५.४ अंश ‎तर जेऊर येथे तापमान ३५ अंश सेल्सिअस तापमानाची नोंद झाली. आज (ता. २३) कोकणातील रायगड, रत्नागिरी, सिंधुदुर्ग, पुणे घाटमाथा, सातारा घाटमाथा, कोल्हापूरच्या घाटमाथ्यावर मुसळधार पावसाची शक्यता असल्याने दक्षतेचा इशारा ‘ऑरेंज अलर्ट’ देण्यात आला आहे.

मुंबई, ठाणे, पालघर, नाशिक घाटमाथा, चंद्रपूर, गडचिरोली जिल्ह्यात जोरदार सरींची, तसेच नंदूरबार, धुळे, जालना, परभणी, हिंगोली, नांदेड, अमरावती, नागपूर, भंडारा, गोंदिया जिल्ह्यात विजांसह पावसाची शक्यता असल्याने दक्षतेचा इशारा (येलो अलर्ट) आहे. उर्वरित राज्यात तुरळक ठिकाणी हलक्या ते मध्यम पावसाची शक्यता कायम आहे.

मंगळवारी (ता. २२) सकाळी ८.३० पर्यंतच्या २४ तासांमध्ये नोंदले गेलेले तापमान (अंश सेल्सिअसमध्ये) :

‎ठिकाणे---तापमान कमाल---तापमान किमान

‎पुणे---३०.२---२२.५

‎‎धुळे---३३.५---२०.६

जेऊर---३५.०---२०.०

‎‎कोल्हापूर---२८.६---२२.२

‎महाबळेश्‍वर---२०.४---१७.५

मालेगाव---३१.८---२१.६

‎‎नाशिक---२९.३---२२.५

‎निफाड---३१.९---२२.७

‎सांगली---२९.७---२१.९

‎सातारा---२७.८---२२.४

‎सोलापूर---३४.४---२३.१

‎सांताक्रूझ---२७.८---२५.२

डहाणू---३१.५---२४.५

‎रत्नागिरी---२७.०---२४.६

‎छत्रपती संभाजीनगर---३३.४---२२.८

‎धाराशिव---३०.६---२०.२

‎परभणी---३४.४---२४.२

परभणी (कृषी)---३४.०---२२.१

‎‎अकोला---३५.७---२५.८

अमरावती---३४.०---२४.७

भंडारा---३३.१---२५.०

बुलडाणा---३२.४---२३.२

ब्रह्मपुरी---३४.४---२६.०

‎चंद्रपूर---३४.६---२५.२

‎गडचिरोली---३२.०---२३.६

‎गोंदिया---३१.७---२५.४

‎नागपूर---३४.६---२५.६

‎वर्धा---३५.४---२४.५

‎वाशीम---३२.२---२३.६

‎यवतमाळ---३४.२---२४.६