Maharashtra Rain Alert: राज्यात मुसळधारेचा अंदाज; विदर्भ आणि कोकणात पावसाचा जोर वाढण्याचा अंदाज

Pune News: राज्यातील काही भागात मागील २ दिवसांपासून पावसाचा जोर वाढला आहे. तर दुसरीकडे अजूनही काही भागात जोरदार पावसाची प्रतिक्षा कायम आहे. राज्यातील काही भागात जोरदार पावसाचा अंदाज हवामान विभागाने दिला. पूर्व विदर्भ, दक्षिण महाराष्ट्र, पश्चिम महाराष्ट्र आणि कोकणात काही ठिकाणी जोरदार पावसाची शक्यता आहे. 

हवामान विभागाने आज राज्यभरात काही ठिकाणी जोरदार पावसाचा अंदाज दिला.  कोकणातील सर्वच जिल्हे, मराठवाड्यातील सर्व जिल्हे तसेच विदर्भातील सर्वच जिल्ह्यांमध्ये काही ठिकाणी जोरदार पावसाचा येलो अलर्ट देण्यात आला तर. तर सिंधुदूर्ग, रत्नागिरी आणि रायगड जिल्ह्यात काही ठिकाणी जोरदार ते अतिजोरदार पावसाचा ऑरेंज अलर्ट हवामान विभागाने दिला. मध्य महाराष्ट्रातील घाटमाथा आणि पुणे, नगर, नाशिक तसेच जळगाव जिल्ह्यात काही ठिकाणी जोरदार पावसाचा अंदाज हवामान विभागाने दिला. 

उद्या कोकणातील सर्वच जिल्ह्यांमध्ये काही ठिकाणी जोरदार ते अतिजोरदार पावसाचा ऑरेंज अलर्ट हवामान विभागाने दिला. तसेच मध्य महाराष्ट्राच्या घाटमाथ्यावर तसेच धुळे आणि नंदूरबार जिल्ह्यात काही ठिकाणी जोरदार पावसाचा अंदाज आहे. विदर्भातील नागपूर, भंडारा, गोंदीया, चंद्रपूर, यवतमाळ आणि गडचिरोली जिल्ह्यात तसेच मराठवाड्यातील जालना, परभणी, हिंगोली आणि नांदेड जिल्ह्यात काही ठिकाण जोरदार पावसाचा अंदाज आहे. राज्यातील इतर जिल्ह्यांमध्ये काही ठिकाणी ढगाळ हवामानासह हलक्या पावसाचा अंदाजही हवामान विभागाने दिला.

गुरुवारी विदर्भात आणि कोकण तसेच घाटमाथ्यावर पावसाचा जोर वाढण्याची शक्यता आहे. कोकण आणि घाटमाथ्यावर काही ठिकाणी जोरदार ते अतिजोरदार पावसाचा अंदाज आहे. विदर्भातील चंद्रपूर, गोंदीया आणि गडचिरोली जिल्ह्यातही काही ठिकाणी जोरदार ते अतिजोरदार पावसाचा ऑरेंज अलर्ट देण्यात आला.

मध्य महाराष्ट्र आणि मराठवावाड्यात ढगाळ हवामानासह काही ठिकाणी हलक्या ते मध्यम पावसाचा अंदाज आहे. शुक्रवारीही कोकण आणि विदर्भात पावसाचा जोर कायम राहील. तसेच मराठवाड्यातील जालना, परभणी, हिंगोली आणि नांदेड जिल्ह्यात काही ठिकाणी जोरदार पावसाचा अंदाज हवामान विभागाने वर्तविला.