मागील चोवीस तासात राज्यात तापमानात चढ-उतार पाहायला मिळत होते. त्यामुळे विविध भागात सकाळी गारठा आणि दुपारी उन्हाचा चटका जाणवत होता. राज्यातील काही भागात थंडीची चाहूल लागली आहे. कमाल तापमानात काहीशी घट होत आहे.

तर पुढील चार ते पाच दिवस तापमानात मोठे बदल होणार नाहीत. पुढील पाच दिवस मुख्यत कोरड्या हवामानासह निरभ्र आकाश राहील, असा अंदाज हवामानशास्त्र विभागाने वर्तवला आहे. 

आग्नेय अरबी समुद्रावरील समुद्र सपाटीपासून १.५ किलोमीटर ऊंचीवर चक्राकार वाऱ्याची स्थिती आता दक्षिण अरबी समुद्रावर पसरली आहे. मागील चोवीस तासात जळगाव येथे राज्यातील निचांकी १६.१ अंश सेल्सिअस तापमानाची नोंद झाली. 

देशातील तापमानात २ ते ३ अंश सेल्सिअसनं चढ-उतार सुरू आहे. तर उत्तरेतील काही भागात गारठा वाढण्याची शक्यता आहे. परंतु राज्यात मात्र कडाक्याच्या थंडीसाठी अजून काही काळ वाट पाहावी लागणार आहे.

सध्या खरीप हंगामातील काढणी आवरली असून शेतकरी रब्बीच्या पेरणीची लगबग सुरू झाली आहे. त्यामुळे शेतकऱ्यांना थंडीच्या आगमनाची आस लागलेली आहे. राज्यात पुढील पाच दिवस मुख्यत: कोरड्या हवामानासह उन्हाचा चटका जाणवण्याची शक्यता हवामानशास्त्र विभागाने वर्तवली आहे.