Pune News: देशात २०२५ च्या माॅन्सून हंगामात पाऊस कसा पडेल? याची चर्चा आतापासूनच सुरु झाली. काही जागतिक हवामान केंद्रांच्या अंदाजानुसार देशात यंदाही सरासरी पावसाचा अंदाज दिला आहे. युरोपियन हवामान अंदाज केंद्र, दक्षिण कोरियाचे अपेक हवामान केंद्र, कोलंबिया विद्यापिठाचे आयआरआय केंद्र, जपानचा हवामान विभाग, युके हवामान विभाग संस्थांनी भारतात माॅन्सूनमध्ये चांगल्या पावसाचे संकेत दिले. भारतीय हवामान विभाग एप्रिलमध्ये आपला पहीला अंदाज जाहीर करेल. 

मागच्या हंगामात चांगले पाऊसमान झाल्याने शेतकऱ्यांना आता यंदा पाऊस कसा राहील? याचा अंदाज जाणून घेण्यात उत्सुकता आहे. देशात २०२५ चा माॅन्सून कसा राहील ? याविषयी दीर्घकालीन पल्ल्याचा अंदाज भारतीय हवामान विभाग एप्रिल महिन्यात देईलच.

पण प्रशांत महासागरातील हवामान पॅटर्न्सनुसार भारतात जून ते सप्टेंबर या काळात माॅन्सून सरासरी राहील, असे संकेत काही जागतिक हवामान माॅड्यूल्समधून मिळत आहेत. बहुतांशी हवामान विषयक माॅड्यूल्सने अपेक्षा व्यक्त केली की, भारतात माॅन्सून देशभरात व्यापलेला असताना लाल निना स्थिती तटस्थ अवस्थेत येऊ शकते. कोणत्याही जागतिक माॅड्यूलने देशातील कोणत्यातही भागात विशिष्ट काळात कमी पावसाचे संकेत दिलेले नाहीत. 

बहुतांशी माॅड्यूल्समधून जून महिन्यात देशभरात पाऊस पडण्याचा अंदाज आहे आणि ईशान्य भारतातही सरासरी पाऊस पडू शकतो, असे संकेत मिळत आहेत. दक्षिण कोरियाच्या अपेक हवामान केंद्राने आधीच प्रशांत महासागरातील परिस्थिती तटस्थ राहून भारतात माॅन्सूनचा पाऊस सरासरी राहील, असे संकेत दिले आहेत. युरोपियन हवामान अंदाज केंद्राने देशात मार्च, एप्रिल आणि मे महिन्यातही सरासरी पावसाचा अंदाज दिला. मार्च, एप्रिल आणि मे महिन्यात देशात पूर्व मोसमी पाऊस पडतो. युरोपियन हवामान अंदाज केंद्राने हा पाऊस सरासरी किंवा सरासरीपेक्षा जास्त राहील याची ४० ते ५० टक्के शक्यता वर्तविली आहे. 

युरोपियन हवामान अंदाज केंद्राने मे, जून आणि जुलै महिन्यात तमिळनाडू सोडून दक्षिण द्वीपकल्प तसेच पूर्व किनारी भागासह अरबी समुद्रात सरासरीपेक्षा जास्त पावसाचा अंदाज दिला. पूर्व आणि ईशान्य भारतातही या तीन महिन्यांमध्ये चांगला पाऊस राहण्याचा अंदाज या केंद्राने दिला. 

जून, जुलै आणि ऑगस्ट महिन्यात दक्षिण केरळ, कर्नाटक, तमिळनाडू, आंध्र प्रदेश, गुजरातचा किनारी भाग, दक्षिण द्वीपकल्पात माॅन्सून सक्रिय राहील. तसेच पंजाब, जम्मू आणि काश्मिर, लडाख, हिमाचल प्रदेश, उत्तराखंड तसेच उत्तर प्रदेशचा काही भाग, बिहार आणि पश्चिम बंगालच्या काही भागात सरासरीपेक्षा जास्त पावसाचा अंदाजही युरोपियन हवामान अंदाज केंद्राने दिला आहे.  

कोलंबिया विद्यापिठाचे आयआरआय केंद्र, जपानचा हवामान विभाग, युके हवामान विभाग या जागतिक माॅड्यूल्सनीदेखील माॅन्सूनमध्ये चांगल्या पावसाचे संकेत दिले, तरी देखील आत्ताच माॅन्सूनविषयी बोलणे खूपच लवकर आहे. मधल्या काळात वातावरणीय घडामोडी घडून प्रशांत महारागरातील हवामान बदलू शकते. याचा परिणाम आपल्या माॅन्सूनवर होऊ शकतो. त्यामुळे भारतीय हवामान विभाग एप्रिलच्या दीर्घकालीन अंदाजात काय म्हणते, याकडे सर्वांचे लक्ष असेल.