Pune News : राज्यात पुन्हा थंडी वाढली आहे. उत्तरेकडील थंड वाऱ्यांचे प्रवाह वाढल्याने राज्यातील बहुतांशी भागात गारठा पुन्हा वाढू लागला. उत्तर महाराष्ट्रात थंडीचा कडाका जास्त जाणवत आहे.

आज धुळे येथील कृषी महाविद्यालयात हंगामातील सर्वात कमी ४ अंश सेल्सिअस तापमानाची नोंद झाली. राज्यात आणखी थंडी वाढण्याचा अंदाज हवामान विभागाने वर्तविला आहे.

पश्चिमेकडून वाहणाऱ्या जोरदार वाऱ्यांमुळे देशाच्या उत्तरेकडील राज्यांमध्ये थंडीचा कडाका कायम आहे. आज हरियानातील हिस्सार आणि राजस्थानमधील चुरू येथे ४.५ अंश सेल्सिअस तापमानाची नोंद झाली. 

तर राज्यातील धुळे येथील कृषी महाविद्यालयात देशातील सर्वात कमी ४ अंश सेल्सिअस किमान तापमानाची नोंद झाली. हे तापमान चालू हंगामातील सर्वात निच्चांकी ठरले आहे. तर निफाड येथील गहू संशोधन केंद्रात ८.९ अंश सेल्सिअस किमान तापमानाची नोंद झाली. तर जळगाव येथे ८.७ अंश सेल्सिअस आणि नंदूरबार येथे ९.७ अंश सेल्सिअस तापमानाची नोंद झाली. 

विषुववृत्तीय हिंद महासागर आणि आग्नेय बंगालच्या उपसागरातील कमी दाब क्षेत्र आणखी ठळक झाले आहे. आज हे ठळक कमी दाब क्षेत्र नैऋत्य बंगालच्या उपसागरात होते. ही प्रणाली तमिळनाडू आणि श्रीलंकेच्या किनाऱ्याकडे येण्याचे संकेत हवामान विभागाने दिले आहेत.