Budget 2024: अर्थसंकल्पात पीएम किसान योजनेचा उल्लेख केला नसला तरी पीएम किसान योजनेसाठी मात्र गेल्या वर्षीइतकीच म्हणजे ६० हजार कोटी रूपयांची तरतूद प्रस्तावित आहे. तर महात्मा गांधी राष्ट्रीय ग्रामीण रोजगार हमी योजनेसाठी गेल्या वर्षीप्रमाणेच ८६ हजार कोटी रूपये प्रस्तावित करण्यात आले आहेत. त्यामुळं शेतकऱ्यांनी मनरेगा बंद होणार, पीएम किसान बंद होणार या अफवांवर विश्वास ठेऊ नये. एकमात्र खरं की, केंद्र सरकार उठता बसता ज्या पीएम किसान योजनेचा नामजप करतं, त्याचा अर्थसंकल्पात साधा उल्लेख केलेला नाही. त्यावरून केंद्र सरकारचा लाभार्थी योजनांवरचा फोकस पुढील काळात कमी होण्याची शक्यता व्यक्त केली जाऊ लागलीय. नीती आयोगाकडून सुरू असलेलं पीएम किसान योजनेचं मूल्यांकन २९ जुलै रोजी पूर्ण होणार आहे. त्यानंतर केंद्र सरकारला नीती आयोग काय सूचना करतं, ते पाहावं लागेल.