Soybean MSP: नाफेडकडून हमीभावाने सोयाबीन खरेदी करताना निर्माण झालेल्या गोंधळावरून विधानसभेत विरोधकांनी पणन विभागावर जोरदार टीका केली. "ही खरेदी योजना शेतकऱ्यांसाठी आहे की व्यापारी आणि दलालांसाठी?" असा थेट सवाल करत त्यांनी नाफेडच्या खरेदी प्रक्रियेवर प्रश्नचिन्ह उपस्थित केलं. दरम्यान, भाजपचे ज्येष्ठ नेते सुधीर मुनगंटीवार यांनी आर्थिक गुन्हे अन्वेषण शाखेप्रमाणे कृषी गुन्हे अन्वेषण शाखा स्थापन करावी, तसेच ग्राहक न्यायालयांच्या धर्तीवर कृषी न्यायालये सुरू करावीत, अशी मागणी मांडली. यावर उत्तर देताना पणन मंत्री जयकुमार रावल यांनी, “या मागणीनुसार मुख्यमंत्र्यांशी चर्चा करून लवकरच निर्णय घेऊ,” असं आश्वासन दिलं.