Bakri Eid 2025: बकरी ईदच्या पार्श्वभूमीवर ३ ते ८ जूनदरम्यान राज्यातील सर्व जनावरांचे बाजार बंद ठेवावेत, अशा आशयाचे पत्र गोसेवा आयोगाने बाजार समित्यांना पाठवले आणि त्यामुळे मोठा वाद निर्माण झाला. या पत्रामुळे शेतकरीविरोधी निर्णय झाल्याची टीका झाली, तसेच त्याला धार्मिक वळण मिळाल्याने जनतेत संताप व्यक्त झाला. वाद वाढू नये म्हणून राज्य सरकारने हस्तक्षेप करत सुधारित पत्र प्रसिद्ध केले. त्या पत्रात “सर्व गुरांचे बाजार” या उल्लेखाऐवजी “देशी गोवंशाचे बाजार” असा बदल करण्यात आला. मात्र या सगळ्या प्रकारामुळे अनेक प्रश्न निर्माण झाले आहेत. खरंतर महाराष्ट्रात १९७६ पासूनच गोहत्या बंदी आहे. ४ मार्च २०१५ पासून संपूर्ण गोवंश हत्याबंदी कायदा लागू करण्यात आला. त्यामुळे गाईंबरोबरच बैल, वळू, खोंड यांच्यावरही बंदी आहे. गोसेवा आयोगाचे म्हणणे आहे की, ७ जून रोजी बकरी ईदच्या दिवशी मोठ्या प्रमाणावर जनावरांची कुर्बानी केली जाते आणि त्यात गोवंशाचीही कत्तल होण्याची शक्यता असते. त्यामुळे अधिनियमाचे उल्लंघन होऊ नये म्हणून जनावरांचे बाजार भरू नयेत, अशी सूचना आयोगाने मूळ पत्रात केली होती.