Pune News : पिकांवर कोणत्यावेळी फवारणी करावी याची माहिती होण्यासाठी महात्मा फुले कृषी विद्यापीठ, राहुरीने पुढाकार घेऊन फुले स्प्रे इंडिकेटर (फुले फवारणी सूचक) हे मोबाइल ॲप्लिकेशन (ॲप) विकसित केले आहे.

त्यामुळे शेतकऱ्यांना फवारणीची योग्य वेळ ठरवण्यास मदत करून त्यांचा वेळ, पैसा व श्रम या तिन्ही गोष्टींची बचत करणारे फुले स्प्रे इंडिकेटर (फुले फवारणी सूचक) या मोबाइल ॲप्लिकेशनचा शेतकऱ्यांनी लाभ घ्यावा, असे आवाहन करण्यात येत आहे.

मोबाइल ॲप्लिकेशन गूगल प्ले स्टोअरवर मोफत उपलब्ध असून ते इंटरनेटची सोय असताना म्हणजेच ऑनलाइन व इंटरनेटची सोय नसताना देखील म्हणजेच ऑफलाइन या दोन्हीही मोडमध्ये काम करते.

या फुले स्प्रे इंडिकेटर (फुले फवारणी सूचक) ॲपच्या आधारे शेतकऱ्यांना सध्याचे वातावरण हे पिकावर फवारणी करण्यास योग्य आहे की नाही हे डेल्टा टी चार्टच्या आधारे अत्यंत सोप्या पद्धतीने पाहता येते.

या ॲप्लिकेशन (ॲप) च्या माध्यमातून फवारणी करण्यास सुयोग्य वेळ हिरव्या रंगाच्या माध्यमातून, फवारणी करण्यास साधारणतः योग्य वेळ पिवळ्या रंगाच्या माध्यमातून तर फवारणी करिता अयोग्य वेळ लाल रंगाच्या माध्यमातून दाखवली जाते व शेतकऱ्यांना फवारणी करण्याबाबतचा निर्णय घेणे अतिशय सोपे होते.

हे ॲप्लिकेशन महात्मा फुले कृषी विद्यापीठाच्या एक्सलन्स सेंटर (गुणवत्ता केंद्र) : अद्ययावत व काटेकोर शेतीसाठी डिजिटल तंत्रज्ञान या प्रकल्पाअंतर्गत प्रमुख शास्त्रज्ञ पुणे कृषी महाविद्यालयाचे सहयोगी अधिष्ठाता डॉ. महानंद माने, माजी संशोधन संचालक डॉ. सुनील गोरंटीवार, सहयोगी प्रा. डॉ. सुनील कदम, डॉ. सोमनाथ माने या शास्त्रज्ञांच्या चमूने विकसित केले आहे.

हे ॲप्लिकेशन विकसित करण्यासाठी महात्मा फुले कृषी विद्यापीठाचे कुलगुरू डॉ. प्रशांतकुमार पाटील व विद्यापीठाचे संशोधन संचालक डॉ. विठ्ठल शिर्के यांचे मार्गदर्शन मिळाले.