Solapur News : शेतीमध्ये नवतंत्रज्ञानाचा वापर वाढला आहे. त्यात आणखी बदल होत राहणार आहेत, पण भविष्यातील शेतीमध्ये कृत्रिम बुद्धिमत्तेचा वापर अधिक वाढणार आहे, असे विभागीय कृषी सहसंचालक दत्तात्रय गावसाने यांनी सांगितले.

कृषी विज्ञान केंद्र, सोलापूर येथे सुरू असलेल्या कृषी तंत्रज्ञान महोत्सवाच्या दुसऱ्या दिवशीच्या मार्गदर्शन सत्रात प्रमुख पाहुणे म्हणून ते बोलत होते. कार्यक्रमाच्या अध्यक्षस्थानी कृषी विज्ञान केंद्र, सोलापूरचे प्रमुख व वरिष्ठ शास्त्रज्ञ डॉ. लालासाहेब तांबडे होते.

श्री. गावसाने म्हणाले, की शेतीचे प्रश्‍न बदलतायेत, शेतीच्या कामात बदल होत आहेत. यापुढे व्यक्तिगत शेती करणे अवघड असणार आहे, त्यासाठी गटशेती फायद्याची ठरणार आहे. गट शेतीच्या माध्यमातून आपली तांत्रिक ज्ञानाची गरज भागविण्यासाठी वेगवेगळ्या कृषिविषयक कार्यालयांशी सामूहिकरीत्या संपर्क करणे आणि आपल्या समस्या सोडवून घेणे अधिक सोपे राहणार आहे, असे ते म्हणाले.

डॉ. तांबडे यांनी कृत्रिम बुद्धिमत्तेचा वापर कृषी क्षेत्रात अजून व्यापक प्रमाणात होणार आहे, शेतकरी बांधवांनी या विषयी जागृकता दाखवत हे तंत्रज्ञान समजून घ्यावे, असे सांगितले.

विविध विषयांवर तांत्रिक सत्रे

तांत्रिक सत्रात राष्ट्रीय डाळिंब संशोधन केंद्राच्या शास्त्रज्ञ डॉ. शिल्पा परशुराम यांनी या वेळी डाळिंब लागवड व त्याचे प्रक्रियायुक्त पदार्थ या विषयी मार्गदर्शन केले. तसेच बारामती कृषी विज्ञान केंद्राचे मृदाशास्त्रज्ञ डॉ. विवेक भोईटे यांनी ऊस उत्पादन वाढीसाठी कृत्रिम बुद्धिमत्तेचा वापर करून एकरी १०० टनांपेक्षा जास्त उत्पादन घेणारे शेकडो शेतकरी आहेत. कोल्हापूरपासून नांदेडपर्यंत शेतकऱ्यांच्या यामध्ये सहभाग आहे.

ए.आय.चा वापर करून पिकाला लागणाऱ्या पाणी, खते, मजुरी, वीज प्रदूषण यामध्ये बचत करता येते. तसेच अचूक निदानाद्वारे शेतकऱ्यांना आगाऊ सूचना मिळाल्यामुळे पिकातील कीड व रोग व्यवस्थापन करणे शक्य होते, असे सांगितले.