नाशिक : जागतिक बँक (World Bank) अर्थसाह्यित मा. बाळासाहेब ठाकरे कृषी व्यवसाय व ग्रामीण परिवर्तन प्रकल्पांतर्गत (SMART Project) बाजार समित्यांच्या वार्षिक क्रमवारीत लासलगाव कृषी उत्पन्न बाजार समितीने (Lasalgaon APMC) राज्यात प्रथम क्रमांक पटकविला आहे.

स्मार्ट प्रकल्प अंमलबजावणी कक्षाचे प्रमुख तथा राज्याचे पणन संचालक सुनील पवार यांच्या अध्यक्षतेखालील समितीने राज्यस्तरीय क्रमवारीत बाजार समितीस मानांकन निश्‍चित केले असल्याचे बाजार समितीस कळविल्याची माहिती सभापती सुवर्णा जगताप यांनी दिली. लासलगाव बाजार समितीच्या २०२१-२२ या वर्षाच्या वार्षिक कामगिरीची पाहणी जिल्हा उपनिबंधक, सहकारी संस्था, नाशिक यांच्या मार्गदर्शनाखाली सहायक निबंधक, सहकारी संस्था, निफाड यांच्या कार्यालयाने वस्तुनिष्ठ गुणांकनाचा प्रस्ताव पणन संचालनालयातील स्मार्ट प्रकल्प अंमलबजावणी कक्षास सादर केला होता. त्याप्रमाणे प्रस्तावांची छाननी करून एकूण २०० गुणांपैकी १६३ गुण देऊन क्रमवारीत प्रथम क्रमांक दिलेला आहे.

कामकाज दृष्टिक्षेपात...

लासलगाव बाजार समितीने शेतमाल विक्रीची व्यवस्था अधिक कार्यक्षम करण्याच्या दृष्टीने व्यापारी वर्गाशी समन्वय साधून अमावास्या, शनिवार व इतर शासकीय सुट्ट्यांच्या दिवशी लिलावाचे कामकाज सुरू केल्यामुळे वर्षभरात लिलावाचे कामकाज वाढले. तसेच उन्हाळ्यात व पावसाळ्यात शेतीमाल लिलावासाठी मुख्य व उपबाजार आवारांवर भव्य लिलाव शेडची उभारणी करून ऐन कोरोना कालावधीत शेतकऱ्यांना पिशवी मार्केटच्या माध्यमातून कांदा विक्रीची सुविधा निर्माण करून दिली. तसेच खानगाव नजीक येथे फळे व भाजीपाला लिलाव सुरू करून शेतकऱ्यांना पर्याय उपलब्ध करून दिला, असे जगताप यांनी सांगितले.