Amravati News : कृषी आयुक्‍तांच्या सूचनांकडे कृषी विभागाकडून दुर्लक्ष होत आहे. परिणामी, सर्व्हर डाउन असल्याचे कारण देत एक रुपया पीकविमा योजनेत ‘सीएससी’ केंद्रसंचालकांकडून शेतकऱ्यांची लूट कायम आहे.

पीकविमा योजनेला प्रोत्साहन देण्यासाठी यंदाच्या हंगामात शेतकऱ्यांना केवळ एक रुपया विमा हप्ता द्यावा लागणार आहे. त्यासाठी ऑनलाइन प्रस्ताव दाखल करण्यासाठी ३१ जुलैपर्यंतची मुदत देण्यात आली आहे.

अमरावती विभागातील पाच जिल्ह्यांत त्यानुसार आतापर्यंत एक लाखावर शेतकऱ्यांनी नोंदणी केली आहे. योजनेअंतर्गत शेतकऱ्यांना एक रुपयाचाच भरणा करावा लागणार असताना सीएससी केंद्र संचालकांकडून मात्र सर्वदूर १०० ते १३० रुपये आकारले जात आहेत.

एक रुपयाचा भरणा करताना सर्व्हर डाउन होतो, अशी थाप सीएससी केंद्रसंचालकांद्वारे मारली जात आहे. १०० रुपये विमा योजनेचे प्रस्ताव दाखल करण्यासाठी तर ३० रुपये सातबारा काढण्यासाठी घेतले जात आहेत. हे सारे प्रकार बिनबोभाट घडत असताना कृषी विभागाकडून त्यावर नियंत्रणासाठी कोणतेच प्रयत्न होत नसल्याची स्थिती आहे.

कृषी विभागाचे दुर्लक्ष

कृषी आयुक्‍तांनी एका आदेशान्वये १ रुपयात असलेल्या पीकविमा योजनेच्या अंमलबजावणी संदर्भात सूचना केल्या होत्या. कृषी विभागाने शेतकऱ्यांची लूट होत असलेल्या केंद्रांवर लक्ष ठेवण्याच्या सूचना दिल्या होत्या. परंतु जिल्ह्यात असे होताना दिसत नाही.