Chhatrapati Sambhajinagr News : मुख्यमंत्री सौर कृषी वाहिनी योजनेअंतर्गत सौरऊर्जा प्रकल्प उभारण्यासाठी जिल्ह्यातील काही तालुक्यांतील ४१ ठिकाणची एकूण १ हजार ५२९ एकर गायरान जमीन सर्व विभागांच्या एनओसीसह महावितरण कंपनीकडे हस्तांतरित करण्यात आली आहे.

या संदर्भात सोमवारी (ता. २८) मुंबईत बैठक झाली. प्रकल्प पूर्ण होताच जिल्ह्यातील शेतकऱ्यांना दिवसाही सवलतीच्या दरात वीज मिळणे शक्य होणार आहे. मराठवाडा विभागात मुख्यमंत्री सौर कृषी वाहिनी योजनेअंतर्गत सौरऊर्जा प्रकल्पासाठी छत्रपती संभाजीनगर जिल्ह्याची निवड करण्यात आली आहे.

येथे पथदर्शी म्हणून हा प्रकल्प यशस्वी झाल्यानंतर विभागात त्याचा विस्तार होईल. जिल्ह्यातील शेतकऱ्यांना सवलतीच्या दरात दिवसा शेतीला पाणी देता यावे, या उद्देश्याने ही योजना हाती घेण्यात येत आहे. १०४ ठिकाणी हा प्रकल्प उभारण्यात येणार आहे. पहिल्या टप्प्यांत ४७ ठिकाणी सौरऊर्जा प्रकल्पासाठी जागांची पाहणी करण्यात आली होती.

त्यापैकी ४१ जागा जिल्हा प्रशासनाने सर्व विभागांच्या एनओसींसह एमएसईबीला हस्तांतरित केल्या असून, एकूण १५२९ एकर गायरान जमीन त्यासाठी दिली आहे. त्याचा करारनामाही नुकताच करण्यात आला आहे.

अडचणींमुळे ६ ठिकाणचे प्रस्ताव तूर्तास थांबविले आहेत. या ४१ क्लस्टरमधून १३८ मेगावॉट वीजनिर्मिती या सौरऊर्जा प्रकल्पातून होणार आहे. ३ रुपये प्रति युनिट वीज शेतकऱ्यांना मिळेल, असा प्राथमिक अंदाज आहे.