परभणी ः दुधना नदीकाठच्या गावातील पाणीटंचाई निवारणासाठी निम्न दुधना प्रकल्पाचे सहा दरवाजे उघडले. येथून शुक्रवारी (ता.२८) सकाळी साडेनऊ वाजता दुधना नदीपात्रात विसर्ग सुरू करण्यात आला.

शुक्रवारी सकाळी साडेनऊ वाजता निम्न दुधना प्रकल्पाच्या जलाशयातील पाणी पातळी ४२४.४१० मीटर होती. प्रकल्पाचे द्वार क्रमांक १ व २०, २ व १९ हे चार द्वारे ०.२० मीटरने तसेच द्वार क्रमांक ३ व १८ हे ०.१० मीटरने उघडण्यात आले.  एकूण ३०५६ क्युसेक्स विसर्ग नदीपात्रात सोडण्यात आला आहे.

दुधना नदीकाठच्या गावातील नागरिकांनी सतर्क राहावे. नदीपात्रात उतरू नये. तसेच गुरेढोरे, इतर तत्सम प्राण्यांना नदीपात्रात उतरू देऊ नये. शेती अवजारे, विद्युत पंप लागलीच काढून घ्यावेत. मोरगाव, इरळद, नांदगाव, झरी, सनपुरी बंधाऱ्याच्या फळ्या  काढून घेण्याची कार्यवाही जिल्हा परिषदेच्या जलसंधारण विभागाने करावी, असे निर्देश सेलू येथील निम्न दुधना पाटबंधारे उपविभाग क्रमांक २ चे उपविभागीय अधिकाऱ्यांनी दिले.