सिंधुदुर्गनगरी ः निसर्गाचा समतोल राखून ग्रामीण विकास कसा करता येऊ शकतो याचे नवतंत्रज्ञान जिल्ह्यातील शेतकरी आणि मच्छीमारांना देणे आवश्यक असल्याचे मत माजी केंद्रीयमंत्री सुरेश प्रभू यांनी येथे व्यक्त केले.

राष्ट्रीय कृषी व ग्रामीण विकास बँक आणि लुपिन फाउंडेशनच्या माध्यमातून जिल्ह्यातील सात कंपन्यांचे संचालक, मुख्याधिकारी यांच्यासाठी प्रशिक्षण कार्यक्रमाचे आयोजन कुडाळ येथे करण्यात आले होते. या कार्यक्रमाला मानव साधन विकास संस्थेच्या उमा प्रभू,  राजन तेली, नाबार्डचे संचालक अजय थुटे, योगेश प्रभू, अतुल काळसेकर, नकुल पार्सेकर आदी उपस्थित होते.

श्री. प्रभु म्हणाले, की शेतकऱ्यांबरोबर जिल्ह्यातील मच्छीमार निसर्गावर अवलंबून असतात. त्यांना निसर्गाशी सुसंगत असे तंत्रज्ञान प्रशिक्षणामधून दिल्यास विकास प्रक्रियेतून सुवर्णमध्य साधता येईल. कोकणातील शेतकरी मनाने भक्कम आहे. त्यामुळे तो कधीही आत्महत्येचा विचार करीत नाही. शेतकऱ्यांना नवीन तंत्रज्ञानाचे प्रशिक्षण दिल्यास ग्रामीण विकास प्रकियेत क्रांती होईल, असा विश्वास त्यांनी व्यक्त केला.

नाबार्ड आणि लुपिनने स्थापन केलेल्या कंपन्यांकडून त्या अनुषंगाने काम करणे अपेक्षित आहे. ग्रामीण विकासात या कंपन्यांनी भर देण्याची सध्या गरज निर्माण झालेली आहे. या कामासाठी सर्वतोपरी सहकार्य करण्याचे आश्वासन देखील त्यांनी दिले.