दहिवडी, जि. सातारा  : पावसाने जोरदार तडाखा दिल्याने माण तालुक्‍यात शेती व पिकांचे मोठे नुकसान झाले आहे. अगोदर दुष्काळाने मारले अन्‌ नंतर पावसाने झोडपल्याने शेतकरी हवालदिल झाले आहेत. त्यातच शासनाकडून शेतकऱ्यांना मदत मिळणे दूरच, पण दिलासाही दिला जात नसल्याचे दिसत आहे. नुकसानीचे प्रत्यक्ष पंचनामे होण्यात अक्षम्य दिरंगाई होताना दिसत आहे.

यंदा तालुक्‍यात सरासरीच्या दुप्पट पाऊस झाला. यामुळे तलाव, ओढे, नदी, बंधारे पूर्ण क्षमतेने भरून वाहत आहेत. एकीकडे हा पाऊस सुखावणारा असला तरी प्रमाणापेक्षा जास्त पाऊस झाल्याने शेतीचे मोठे नुकसान झाले. शेतात पाणी साठल्याने उभी पिके कुजून गेली. काही ठिकाणी धाडसाने केलेली पेरणी कुचकामी ठरली. बियाणे, रोपे उगवलीच नाहीत. काही ठिकाणी पाणी साठून राहिल्याने वाफसा आला नाही. त्यामुळे पेरणी वा लागवड करणे अशक्‍य झाले.

शेतकऱ्यांना मोठ्या आर्थिक नुकसानीला सामोरे जावे लागले. अजूनही अनेक शेतात पाणी साचलेले असून, कांद्यासारख्या पिकांचे नुकसान झाले आहे. दावणीतील जनावरे चाऱ्यासाठी हंबरडा फोडत असल्याने नाईलाजास्तव जीव धोक्‍यात घालून केवळ जनावरांसाठी शेतकरी उरलासुरला चारा काढण्याचा प्रयत्न करत आहेत. 

नुकसानीचे पंचनामे प्रशासनाने समन्वय साधून तत्काळ करण्याची गरज आहे. मात्र, दुर्दैवाने तसे होताना दिसत नाही. महसूल, ग्रामविकास व कृषी विभागातील कर्मचाऱ्यांनी युद्धपातळीवर हे काम केले पाहिजे. मात्र, काही कर्मचारी याकडे दुर्लक्ष करताना दिसत आहेत. अनेक ठिकाणी शासनाने दिलेल्या सूचना व घातलेल्या अटींमुळे पंचनामे करताना तांत्रिक समस्या उभ्या राहत आहेत. राजकीय मंडळी हे सरसकट पंचनामे झाले पाहिजेत, अशी मागणी करत आहेत. तर प्रशासन नियमानुसार पंचनामे करण्यावर अडले आहे. यात कर्मचाऱ्यांची ससेहोलपट होत असून, शेतकरी मदतीपासून वंचित राहण्याची शक्यता आहे.  सर्व ठिकाणचे पंचनामे करण्याचे काम सुरू आहे. संबंधित पंचनाम्यांची माहिती जमा केली जात आहे. पंचनामे झाले नसतील अथवा व्यवस्थित केले जात नसतील तर संबंधित कृषी सहायक आणि ग्रामसेवकांना विचारणा करून शहानिशा करण्यात येईल, अशी माहिती प्रांताधिकारी अश्विनी सोनवणे-जिरंगे यांनी दिली.