जालना : जिल्ह्यात ‘मृग बहार २०२१’च्या सीताफळ पीक विमा परतावाप्रमाणेच डाळिंब, मोसंबी, लिंबू, पेरू या फळपिकांच्या मंजूर विमा परताव्यातही मंडळागणिक तफावत दिसून येत आहे.

जालना जिल्ह्यात पुनर्रचित हवामान आधारित फळपीक विमा योजने अंतर्गत ‘मृगबहार २०२१’ साठी मंडळनिहाय विमा नुकसान भरपाई मंजूर करण्यात आली आहे. जिल्ह्यातील ३८ पैकी २८ मंडळांतील सीताफळ उत्पादकांना वीमा परतावा मंजूर झाला. परंतु १० मंडळे त्यामधून वगळली गेली. त्याचप्रमाणे आता डाळिंब, मोसंबी, लिंबू, पेरू या फळपिकांच्या विमा परताव्यातही तफावत दिसून येत आहे. 

जिल्ह्यातील ३८ पैकी केवळ १८ मंडळांतील डाळिंब उत्पादकांना विमा परतावा मंजूर झाला आहे. त्यापाठोपाठ ११ मंडळांतील मोसंबीसाठी, १२ मंडळांत लिंबूसाठी, १६ मंडळातील पेरूसाठी, एका मंडळातील चिकूसाठी विमा परतावा मंजूर झाला आहे. त्यात तफावत दिसून येत आहे. अनवा मंडळात मोसंबीसाठी हेक्‍टरी १२ हजारांचा, तर उर्वरित १० मंडळात हेक्‍टरी १८ हजार रुपये विमा परतावा मंजूर झाला आहे. डाळिंबासाठी १८ पैकी शेलगाव मंडळात २९०००, परतूर मंडळात २३ हजार ६००, वाटूर व विरेगाव मंडळात ५९०० रुपये तर इतर १४ मंडळात ११ हजार ८०० रुपये प्रतिहेक्‍टरी परतावा मंजूर झाला आहे. 

लिंबूसाठी अनवा मंडळात सर्वाधिक ३५ हजार रुपये हेक्टरी तर इतर ११ मंडळात १७ हजार ५०० रुपये विमा परतावा मंजूर झाला आहे. पेरूसाठी ज्या १६ मंडळात विमा परतावा मंजूर झाला. त्यापैकी १२ मंडळात हेक्‍टरी १२ हजार रुपये, तीन मंडळात हेक्टरी ३० हजार रुपये, तर अनवा मंडलात हेक्टरी २४ हजार रुपये प्रतिहेक्टरी परतावा मंजूर झाला आहे. चिकूसाठी जालना ग्रामीण मंडळात हेक्‍टरी २७ हजार रुपयेप्रमाणे पीक विमा परतावा मंजूर झाला आहे, अशी माहिती कृषी विभाग व विमा कंपनीच्या सूत्रांनी दिली.