पुणे : ॲग्रोवनमधून दररोज प्रकाशित होणाऱ्या ‘चकाट्या’ या व्यंगचित्र मालिकेची आज (ता.१) तपपूर्ती होत आहे. शेती आणि ग्रामिण जीवनाशी निगडित असंख्य विषयांवरील लहू काळे यांच्या व्यंग्यचित्रांना वाचकांनी या दीर्घ प्रवासात भरघोस प्रतिसाद दिला.  सतत बारा वर्षे केवळ शेती आणि ग्रामीण विषयाशी निगडित विषयांची निर्मिती हे श्री. काळे यांच्या व्यंग्यचित्रांची वैशिष्ट्ये ठरली. शेतकऱ्यांचे प्रश्‍न-समस्या, समाज जीवन, शैक्षणिक, प्रबोधनात्मक, राजकीय आदी विषयांसह कौटुंबिक, मैत्री, नातं अशा भावविश्‍वातील व्यंगचित्रांनी वाचकांच्या मनात आपले स्वतंत्र स्थान मिळविले.  ॲग्रोवनच्या माध्यमातून आणि चकाट्या सदरातून बारा वर्षांच्या काळात श्री. काळे यांची चार हजारपेक्षाही अधिक व्यंग्यचित्रे प्रकाशित झाली आहेत. याची दखल ‘आशिया बुक ऑफ रेकॉर्ड ’, ‘इंडिया बुक ऑफ रेकॉर्ड’, ‘वर्ल्ड  रेकॉर्डस्‌ ऑफ इंडिया’ या नोंद संस्थांनीही घेतली आहे. अनेक वाचकही नियमितपणे ‘चकाट्या’तील आवडलेल्या विषयांचा पत्रव्यवहारही करत असतात.  ॲग्रोवनच्या साथीने आणि बळिराजाच्या आशीर्वादाने हा टप्पा  मला पार करतात आला, याचे मोठे समाधान आहे. यापुढेही चकाट्याच्या माध्यमातून शेतकऱ्यांना बळ देणारे विषय मी मांडत राहणार आहे. - लहू काळे, व्यंग्यचित्रकार