नाशिक: रब्बी हंगामातील पेरण्या सुरू असून काही ठिकाणी खतांचा तुटवडा असल्याने काही विक्रेत्यांकडून जादा दराने खत विक्री होत असल्याची स्थिती आहे. या पार्श्वभूमीवर कृषी विभागाच्या भरारी पथकाकडून जिल्ह्यात ठिकठिकाणी खत विक्री दुकानांच्या तपासण्या करण्यात आल्या. यात लासलगाव (ता.निफाड) येथील कृषी मित्रा अॅग्रो आणि भंडारी ब्रदर्स हे दोन्ही खत विक्रेते शेतकऱ्यांना जादा दराने खतविक्री करत असल्याचे निदर्शनास आले. त्यामुळे कृषी विभागाच्या गुणवत्ता व नियंत्रण विभागाच्या भरारी पथकाने या दोघा खत विक्रेत्यांना विक्री बंद करण्याचे आदेश देत संबंधितांवर कारवाई केली.  शेतकऱ्यांचा गैरफायदा घेत जादा दराने खत विक्री करण्याचा प्रकार लासलगाव येथे आढळून आल्याने पुन्हा एकदा शेतकऱ्यांची कोंडी करण्याचा प्रकार उजेडात आला आहे. यामुळे या दुकानदारांना खत विक्री बंद करण्याचे आदेश दिले. यावेळी नाशिक विभागीय तंत्र अधिकारी (गुणवत्ता)संजय शेवाळे,विभागीय गुणवत्ता नियंत्रण निरीक्षक जितेंद्र पानपाटील, मोहीम अधिकारी अभिजित जमधडे,जिल्हा गुणवत्ता व नियंत्रण निरीक्षण अभिजित घुमरे यांनी ही कारवाई केली आहे.  खते खरेदीची पक्के बिले घ्यावीत  जादा दराने खतांची विक्री होत असल्याने शेतकऱ्यांनी अनुदानित खते घेताना इ-पॉझमधून बिलाची मागणी करावी, खते खरेदीचे पक्के बिले घ्यावीत, असे आवाहन विभागीय कृषी सहसंचालक संजीव पडवळ यांनी केले आहे.