Gondia News : पूर्व विदर्भातील तलावांच्या जिल्ह्यात शिंगाडा उत्पादन मोठ्या प्रमाणावर घेतले जाते. यंदाच्या हंगामात संततधार पावसामुळे अनेक तलावातील शिंगाडा वेल वाहून गेले. परिणामी, गेल्या काही हंगामाच्या तुलनेत या वेळी दर चांगले असल्याचे शिंगाडा उत्पादक गणराज नान्हे यांनी सांगितले.

मालगुजारी तलाव त्यासोबतच जिल्हा परिषद आणि खासगी तलाव भाडेतत्त्वावर घेत पूर्व विदर्भातील अनेक गावांमध्ये शिंगाडा उत्पादन घेण्यावर शेतकऱ्यांचा भर राहतो. या भागातील ढिवर समाज बांधवांचा हा पूर्वापार चालत आलेला व्यवसाय आहे. या वेळी पावसाची संततधार होती. परिणामी, अनेक तलावातील शिंगाडा वेल वाहून गेले.

त्याच्या परिणामी यंदा दरात काहीशी सुधारणा अनुभवण्यात आली आहे. गणराज नान्हे यांच्या माहितीनुसार, १४० रुपये मण (३०० नग) मोठे शिंगाडे व त्यात काही प्रमाणात लहान आकाराचे शिंगाडे असे मिळून सरासरी ३५० नग घाऊक विक्री दरम्यान व्यापाऱ्यांना दिले जातात. या शिंगाड्याची किरकोळ विक्री प्रति शेकडा ८० ते १०० रुपयांनी होत आहे.

शिंगाडा आवक अधिक झाल्यास त्याचा देखील दरावर परिणाम होतो. आरोग्यदायी म्हणून शिंगाडा ओळखला जात असला तरी त्याचा वापर आहारात जास्त होत नाही. त्यामुळे मागणी नसल्यास दर दबावात असतात. कधी कधी तर उत्पादकता खर्चाची भरपाईदेखील शक्‍य होत नाही, अशी खंत गणराज यांनी व्यक्‍त केली. -

गणराज नान्हे यांनी ठाकूर टोला (जि. गोंदिया) परिसरातील पाच एकर तलाव पाच वर्षांकरिता एक लाख रुपयांत भाडेतत्त्वावर घेतला आहे. त्यामध्ये ते सामूहिकस्तरावर शिंगाडा उत्पादन घेतात. जठर शिंगाडा (बियाणे कामी) वापरतो. तो पाण्यात ठेवला जातो. त्याला अंकुर निघाला की तो पाण्यात रोवला जातो.

लागवडीच्यावेळी दोन ते तीन फूट पाणी राहते. मार्च, एप्रिल, मे महिन्यांत लागवड करतो. लवकर लागवड केल्यास उत्पादनही लवकर मिळण्यास सुरुवात होते. त्यानंतरच्या टप्प्यात खत, कीड-रोग नियंत्रणासाठी फवारणी (आठवड्यातून दोनदा), निंदण याप्रमाणे व्यवस्थापन करावे लागते.