Chestnut Crop : धानपट्ट्यात बहरतोय शिंगाडा

Chandrapur : धानपट्ट्यात शिंगाडा हे पीक फायदेशीर ठरत आहे. त्यामुळे शेतकऱ्यांद्वारे धान बांधीत शिंगाडा लागवडीवर भर दिला जात आहे. शिंगाडा पिकाला शेतकऱ्यांचा मिळणारा वाढता प्रतिसाद बघता आत्मा योजनेतूनही याला प्रोत्साहन देत चार हजार रुपयांच्या अनुदानाची तरतूद करण्यात आली आहे.

शिंगाडा हे औषधी गुणधर्मयुक्‍त खाद्यान्न मानले जाते. त्यामुळेच त्याला खवय्यांची देखील मागणी राहते. गोंदिया, भंडारा, गडचिरोली जिल्ह्यांत माजी मालगुजारी तलावात हे वेलवर्गीय पीक घेतले जाते. याला बाजारपेठ देखील उपलब्ध आहे. यातून चांगला पैसा होत असल्याने काही शेतकरी आता थेट धान बांधीत पाणी साठवून या पिकाच्या लागवडीवर भर देत आहेत.

चंद्रपूर जिल्ह्याच्या काही भागात धान (भात) लागवड होते. याच धानपट्ट्यापैकी नागभीड तसेच ब्रह्मपुरी तालुक्‍यात गेल्या काही वर्षात शेतकरी खरिपात धानाऐवजी शिंगाडा लागवडीसाठी पुढे आले आहेत. धान बांधीमध्ये पाणी साठवत याच्या वेली लावल्या जातात. याचा उत्पादकता खर्चही कमी असल्यामुळे शेतकऱ्यांची पसंती या पिकाला मिळत आहे.

नागभीड आणि ब्रह्मपुरी तालुक्‍यात आत्माचे तालुका तंत्रज्ञान व्यवस्थापक जितेंद्र कावळे, अमित हातझाडे यांच्या माध्यमातून शिंगाडा लागवडीला प्रोत्साहन दिले जात आहे. नागभीड तालुक्‍यातील नवेगाव पांडव, नवखळा या गावांमध्ये दहा शेतकऱ्यांद्वारे शिंगाडा लागवड करण्यात आली आहे.

शिंगाडा लागवडीसाठी एक एकराचे एक याप्रमाणे प्रत्येक तालुक्‍यात दहा प्रात्यक्षिक देण्यात आली आहेत. एका प्रात्यक्षिकासाठी चार हजार रुपयांचे अनुदान थेट हस्तांतरण प्रक्रियेच्या माध्यमातून खात्यात वर्ग होते.

वेल वाढविण्यासाठी काही शेतकरी खत देतात तर काही नैसर्गिक पद्धतीने शिंगाडा उत्पादन घेतात. या वर्षी केवळ दहा एकरावर प्रात्याक्षिक असले तरी शेतकऱ्यांचा याला मिळालेला प्रतिसाद बघता या क्षेत्रात पुढील वर्षी वाढीचा प्रस्ताव आहे, असे आत्मा प्रकल्प संचालक प्रिती हिरळकर यांनी सांगीतले.